Сумар дня на 31. січня/януара 2023 р.

Приносиме вам сумар медияльной ґрупы ЛЕМ.фм+ на ден 31. січня/януара 2023 р.

До Ґорлиц приіхал Даґляс Емгофф, муж віцепрезиденткы ЗША Камалі Гарріс. Был видіти жыдівскы місця памяти

Другій джентельмен ЗША Даґляс Емгофф, муж віцепрезиденткы ЗША Камалі Гарріс в неділю 29. січня/януара был з візитом в Ґорлицях. З того міста выводят ся предкы Емгоффа. Юриста, якым наштоден є Емгофф, будучы в Ґорлицях, повіл, што цінным є знати, одкале ся походит, і што має позитивны одчутя по візиті. Підкрислил він, што была для него барз емоцийонуюча. Властям міста, якы го приняли, подякувал м.ін. за плеканя памяти о жыдівскій соспільности, котра жыла в Ґорлицях і сусідстві. Звернул увагу, што не мож забыти про Голокауст, а треба едукувати в тій темі і бороти ся з дезінформацийом. В Ґорлицях муж Камалі Гарріс одвиділ місця памяти, м.ін. штетль, ліс Ґарбач, де Німці доконали масовой еґзекуциі 700 Жыдів, был тіж при памятнику Сидур Прохожых і в Музею Дворы Карвациянів і Ґладышів. Даґляс Емгофф є посланцьом адміністрациі президента Джо Байдена і Камалі Гарріс в обшыри борбы з антисемітизмом на світі і підпераня памяти про Голокауст. Емгофф прилетіл до Польщы в четвер. Ґорлиці были посліднім пунктом його візиты. Скорше был оддати чест памяти жертв лаґру Auschwitz-Birkenau, был тіж в Кракові, а з Ґорлиц переіхал до Берліна.

Зміны в Выборчым кодексі не перешли

В четвер 26. січня/януара проходило другє чытаня новелизациі Выборчого кодексу. Товды тіж віцеміністер рільництва і єдночасно опольскій посол Солідарной Польщы зложыл поправку до реченой новелизациі, жебы выкрислити привілегію для нацийональных і етнічных меншын, котры не мусят перекрочыти в скали державы 5-процентового выборчого порога. Реґулює то 197 арт. Выборчого кодексу. Цілю было предовшыткым унеможливити вхід до сойму представникам німецкой меншыны. Рух тот посол Ковальскій заповідал іщы в листопаді/новембрі минулого рока. Поправка пропала. Од 2007 р. німецка меншына, як єдина має свого преставника в соймі, є ним Ришард Ґалля. Найвеце, аж пятеро, выбороли в 1991 р. В наступній каденциі мала трьох, а в дальшых двох каденциях – по двох. З огляду на чысленніст населіня і політичну ґеоґрафію нияка інча меншына не была николи в силі схоснувати ани з той привілегіі звільніня з вымогу перекорчыня 5-процентового выборчого порога. Інчы европейскы державы, в котрых меншыны мают выборчы привілегіі, то м.ін. Данія, Румунія, Італия, Німці ци Хорвация.

Церковны торжества на Словациі

В суботу 28. січня/януара в Катедральным Соборі св. Йоана Крестителя в Пряшові духовны і вірны споминали 15. річницю реорґанізациі Грекокатолицкой Церкви на Словациі, коли стала ся митрополитном церквом sui iuris. Торжественну архієрейску літургію одслужыл з той нагоды владыка Петро Руснак, апостольскій адміністратор sede vacante пряшівской архієпархіі, а єдночасно братиславскій єпарха. Святкуваня зачали ся уж ден скорше, од науковой конференциі присвяченій подіі. Дальшы празднуваня проходили о ден – в Кошыцях в Катедральным Соборі Рождества Пресвятой Богородиці торжественном архієрейском літургіом дякувало ся за 15 років од выголошыня кошыцкого еґзархату за єпархію. Проґрам святкувань закінчыл ся в понедільок 30. січня/януара. В тот ден была правлена літургія в грецкым языку, котру в пряшівскым Катедральным Соборі одслужыл владыка Мануель Нін, апостольскій еґзарха Грециі. Грекокатолицку Церков на Словациі за митрополитну церков sui iuris з центром в Пряшові выголосил папа римскій Венедикт XVI 30. січня/януара 2008 року. Пряшівскій єпархіі піднял тым статус на архієпархію, кошыцкій апостольскій еґзархат стал кошыцком єпархійом, а вєдно з тым была ериґувана братиславска єпархія.

Дах в каштели ремонтуют для мышпергачів

В рамках порозумліня медже Музейом Дворы Карвациянів і Ґладышів в Ґорлицях а Реґіональном Дирекцийом Охороны Середовиска в Кракові зачали ся модернізацийны роботы при выміні дахового вкрытя на обєкті ренесансового каштелю в Шымбарку вєдно з выконаньом забезпечаючо-адаптацийных робіт, жебы выділити студену простір в кубатурі будинку для мышпергачів. Будинок каштелю в Шымбарку є єдном з векшых літніх колонйі мышпергачів в Польщы і находит ся в охоронній зоні Азиль (Ostoja) Мышпергачів Ґорлицкого Повіту. Не смотрячы на ремонтовы роботы, одділіня того ґорлицкого музею, якым є Каштель в Шымбарку, буде фунґувало в звычайным режімі.