Сумар дня на 4. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 4. квітня/апріля 2022 р.

Підкарпатска Русь на фотоґрафіях Рудольфа Гулкы

Як інформувала в минулым тыжни Славяньска Бібліотека в Празі, інституция удоступнила вшыткы выбраны фотоґрафіі і фотоґрафічны колекциі Рудольфа Гулкы, котры зробил на Підкарпатскій Руси. Рудольф Гулка фотоґрафувал Підкарпатя в першій половині 20. років ХХ столітя, коли робил там як урядник. Підкарпатска Русь входила товды в склад Чехословациі. Фотоґрафіі Гулкы, фарбены, дофарблюваны і чорно-білы, вказуют штоденне жытя, роботу селян і жытелів міст, іх традициі, архітектуру, промысловы будовы, природны мотивы ци ремесельны выробы. Гулка фотоґрафувал так русиньскых жытелів Підкарпатской Руси, якы были векшыном населіня, як і дальшых жытелів – Жыдів, Ромів, Мадярів, якы вєдно з Русинами жыли на тій териториі. Славяньска Бібліотека удоступнила онляйн близко 600 фотоґрафій Гулкы. Дрібниці і мотузок до збіркы найдете в дописі на нашым портали.

Семінар про русиньску і польску нацийональны меншыны на Словациі

В четвер, 31. марця, в інтернетовым просторі одбыл ся семінар пн. «Дві жыючы меншыны в підкарпатскым реґіоні». Онляйновый семінар орґанізуваный Ямаро о.з. тыкал польской і русиньской нацийональных меншын жыючых на Словациі. За русиньску меншыну брали в ним участ Люба Кральова і Владимір Противняк. Семінар проходил в меншыновых – русиньскым і польскым языках. Темы, якых тыкали русиньскы части семінару, то: істория Русинів, вызначны історичны особности, русиньскій язык та будучніст Русинів. Награня з семінару єст доступне в сервісі YouTube і на сайті gorali.info. Проєкт был реализуваный з підпором словацкого Фонду на Підпору Культуры Нацийональных Меншын 2021.

Змінена орґанізация руху на креницкым Дептаку

Як поінформувал бургомайстер Крениці Пьотр Рыба, до кінця квітня/апріля тр. на креницкым Дептаку буде змінена орґанізация руху. Єст то спричынене закрытьом полудньового мосту, якій єст од парох дни ремонтуваный. Окрем ремонту мосту на Дептаку, ревітализуваный буде сквер в сторону ул. Еберса і вколо кіоску при вході на Бульвары Дітля. До кінця того місяця автомобільный рух буде ся одбывал лем пілнічным мостом, а пішы можут іти алейком за ріком Криничанком, з можливістю ввойти на Бульвары Дітля през істнуючы лавкы.

Новый туристичный комунікат Бєщадского Нацийонального Парку

Бєщадскій Нацийональный Парк выдал 1. квітня/апріля новый туристичный комунікат, в котрым інформує, же вшыткы шлякы і природничы стежкы на обшыри Парку сут уж доступны для туристів. В ниже находячых ся обшырях заникат уж сніжна покрыва, сніг утримує ся іщы в высшых партиях гір і выжніх границях ліса. Туристы фурт мусят быти осторожны, зато же на путях єст мокро, а місцями сут іщы покрыты ледом. Обставины до лыжной туристикы сут ачий некорыстны. Природникы припоминают, же ідучы в горы все треба провірити актуальну проґнозу погоды на вебсайті ґрупы GOPR та запознати ся з поданыма на вебсайті Парку вказівками і мапом, што тыкают одвиджаня Парку в зимовым періоді.

Джерело фотоґрафіі: Národní knihovna České republiky – Slovanská knihovna.