Сумар дня на 4. марця 2025 р.

Приносиме вам сумар медияльной ґрупы ЛЕМ.фм+ на ден 4. марця 2025 р.

Пряшівскій Самосправный Край закінчыл реконструкцию двох обєктах культуры, поміч отримал од Підкарпатского Воєвідства

Як поінформувал Пряшівскій Самосправный Край, закінчыли ся реконструкцийны роботы в Выгорлятскым Музею в Гуменным і Піддкуляньскым Освітнім Центрі в Свиднику, котры были спричынены землетрясіньом в 2023 році. 28. лютого/фебруара нововыремонтуваны обєкты одвиджали представникы Краю і Підкарпатского Воєвідства, котре фінансово підтримувало свій партнерскій реґіон. Реконструкция ренесансового каштелю в Гуменным коштувала понад 133 тис. евро, дальшых 46 тис. евро музей перезначыл на інжынєрийно-ґеолоґічны досліджыня, оціны статикы, опрацуваня проєктовой документациі і іншы діяня. Едикацийный Центр в Свиднику вымагал направ о вартости 49 тис. евро. В часі стрічы Маршалок Підкарпатского Воєвідства Владислав Ортиль підкрислил, што поміч єст символом солідарности і погубліня спілпрацы. Ведучый ПСК Мілян Маєрскый подал, што підпора Підкарпатского Воєвідства была ключова і дозволила скоро привернути обєкты культуры до хоснуваня.

Криза в хоснуваню корінных языків, як на тото порадити?

Языковы активісты, а тіж бадачы языка і культуровой достоменности з Европы і Африкы стрітят ся на спільных варштатах в Катальоніі. Єст то можливе завдякы спілправы Lingua Pax і Центра Заанґажуваных Досліджынь над Культуровым Тырваньом на Выділі «Artes Liberales» Варшавского Університету. Участ в них возмут представникы Катальонців, Аранів, Берберів, Дзуків, Лемків, Кашебів, Сардинців, Шлезаків і Вілямівян. Лемківску соспільніст репрезентує наша редакцийна колежанка Наталия Малецка-Новак. Головном темом варштатів єст меджепоколіньова криза в хоснуваню корінных і зміноритизуваных языків і вызваня звязаны з передаваньом языка. Варштаты, презентациі, прелекциі і дискусиі осіб заанґажуваных в жытя спільноты мают помочы в імплементациі найліпшых розвязань до штоденных практик так в домашній, як і публичній сфері.

Яслиска зас сут скомунікуваны, мают автобусове получыня до Дуклі

Коросняньскій повіт урухомил нове автобусове получыня на трасі Дукля-Тылава-Дальова – Яслиска. По роках комунікацийного выключыня до ґміны Яслиска вертат автобусове получыня. Першый переізд новой лениі прошол вчера 3. марця, а ления буде одкрыта мінімально до кінця грудня/децембра тр. Автобусы будут курсувати в робочы дни, од понеділька до пятниці, окрем святочных дни, 4 разы денні – два переізды з Яслиск в страну Дуклі і два курсы назад. З ініциятивом реактивациі получыня выступила війт ґміны Яслиска Беата Мадей. Реализация той задачы была можлива завдякы дофінансуваню з Фонду Розвитку Автобусовых Переіздів і середкам власным з буджету Повіту.

«Церковны забытковы комплексы – проблем захованя історичной вартости в процесі консервациі» прелекция ведена Ярославом Ґємзом

Бєщадскій Центр Культуровой Спадковины просит на дальшу стрічу з циклю «Бєщадска Академія». Подія пройде під гослом «Церковны забытковы комплексы – проблем захованя історичной вартости в процесі консервациі» і буде ведена Ярославом Ґємзом, істориком, знавцьом ікон і церковной архітектуры, автором многых опрацувань, в тым книжкы «Церкви і іконы Лемковины». Прелекция пройде в суботу 8. марця о 18.00 год. в Старій Рафінериі в Устриках Нижніх.