Сумар дня на 4. мая 2021 р.

Приносиме вам сумар медияльной ґрупы ЛЕМ.фм+ на ден 4. мая 2021 р.

В Креници посадили японьскы вышні, а в плянах єст шафранова поляна

В Креници тырват пятый етап ревітализациі головной плыты. Інвестиция поділена была на пят етапів. Будучы працы на дептаку тыкают ся зміны верхньой верствы, ремонту канализациі та одновы амфітеатру і освітліня. Ремонт зачали од пятого етапу тзн. зміны верхньой верствы. Як поінформувал бургомайстер Пьотр Рыба, ревітализация проходит згідні з пляном. В остатнім часі одбыла ся вытинка дерев, котры находили ся в при дептаку, а на іх місце в серци курорту посаджено японьскы вышні. Бургомайстер додал тіж, же місто рыхтує дальшу атракцию. Рішено одтворити шафрановы поляны, котры тым разом найдут ся в самым центрі міста на рынку. Ремонтовы працы тырвати будут до листопада/новембра тр.

«Капличкы Малопольщы 2021»

Соймик Малопольского Воєвідства піднял схваліня тыкаюче дотациі на ремонт забытковых капличок в рамках конкурсу «Капличкы Малопольщы 2021». Того рока на тоту ціль самоуряд передал 550 тис. зл з воєвідскых середків. Тота квота дозволит покрыти кошты модернізациі 52 капличок. Каждого рока конкурс тішыт ся великом поулярністю, так было і того рока, зато до конкурсовой капітулы прислано аж 154 внескы, з чого лем єдна третя отримала дофінансуваня. Серед закваліфікуваных нашли м.ін. ґміна Устя Рускє, з представленом задачом ремонту капличкы в Устю, та ґміна Ґорлиці, котра отримала поміч при консервациі капличкы в Кобылянці.

В Вілямовицях підтримали контроверсийне рішыня

Як подає порталь beskidzka24, Містецка Рада в Вілямовицях підтримала рішыня, якє сопротивлят ся середовискам ЛҐБТ. Рішыня правдоподібно коштувало буде ґміну понад 7 млн зл з Норвежскых Фондів, якы презначены мали быти на будову Музею Вілямівской Культуры. Справу скоментувал бургомайстер місцевости Мариян Треля, котрый повіл, же єст розчаруваный такым рішыньом, а схваліня єст приміром діяня проти ґміні Віламовиці. Голос в тій справі забрало тіж вельох жытелів, котры не згаджают ся на дискримінацию середовиск ЛҐБТ, арґументуючы своє становиско тым, же документ был принятый без консультациі і же вдарят в гідніст негетеронормативных жытелів ґміны. Стоваришыня Вілямівяне зорґанізувало з той нагоды акцию проти дискримінациі під назвом #NieMojaUchwała.

Катажына Шведа номінувана до нагороды ім. Станіслава Бараньчака

В четвер, 29. квітня/апріля, на пресовій конференциі Президент Познаня Яцек Яськовяк подал назвиска авторів номінуваных до Стипендиі-нагороды ім. Станіслава Бараньчака. Серед номінуваных єст Катажына Шведа, фотоґрафка, поетка і авторка збіркы «Босорка». Шведа выховала ся в Котани, а інспірацийом до єй творів часто єст Лемковина, зато в своіх творах навязує до лемківской спадковины. На нашым портали можете чытати інтервю з Катажыном Шведом, де більше оповідат о своій стрічы з лемківском культуром. Результаты конкурсу о стипендию оголошены будут на торжественній ґали, котра пройде 28. мая тр. в Центрі Культуры Замок в Познані.