Сумар дня на 4. мая 2026 р.

Приносиме вам сумар медияльной ґрупы ЛЕМ.фм+ на ден 4. мая 2026 р.

Польскій Сойм вызнал грецку нацийональну меншыныу

Сойм Польской Республикы схвалил новелизацию закону о нацийональных і етнічных меншынах та реґіональным языку, што надає грецкій соспільности жыючій в Польщы статус нацийональной меншыны. Грецка меншына зыскат м.ін. можливіст хоснувати імена і назвиска згідны з языковом традицийом той соспільности, право до наукы языка меншыны та до орґанізуваня шкільництва, в рамках котрого язык і грецка культура можут становити предмет вчыня. Кєд новелизация буде принята сенатом і підписана президентом, Грекы будут десятом нацийональном меншыном в Польщы вызнаном меншыноым законом. Подля даных з посліднього повселюдного списуваня, жыє іх в Польщы близко 5,5 тис., з чого понад 3000 хоснує грецкій язык в домашніх контактах.

В Креници автобусовы довозы будут реализуваны ґмінном безплатном комунікацийом і новом перевозовом фірмом

Як інформувал бургомайстер Крениці Пьотр Рыба, в звязку з завішыньом автобусовых курсів фірмом Rafatex на терені ґміны Крениця, од днес, 4. мая, довозы до Крениці будут реализуваны ґмінном Безплатном Курортном Комунікацийом і за оплатом фірмом Zapopradzie Sp. z o.o. В рамках Безплатной Курортной Комунікациі введены были два новы ранішні курсы з Мушынкы через Тылич до Крениці (о 5:25 і 6:30), што заступят дотеперішні получыня Rafatex. Днес діяльніст зачынат тіж нова перевозова фірма Zapopradzie Sp. z o.o., што буде реализувала платны получыня на подібных принципах як перше Rafatex. Актуальны розклады ізды сут доступны на автобусовых пристанках.

Публикация русиньского автора на польскым выдавничным рынку

На польскым выдавничым рынку явила ся барз цікава публикация русиньского писателя з Руского Керестура Івана Медєші. Як подало выдавництво Ha!art, в передпродажы на іх сайті доступна єст книжка «Ідло» (поль. Jedzenie) Івана Медєші, в тлумачыню Маґдалены Быстшак і Ольгы Ставіньской на польскій язык. То шіст оповідань о вшелеякых уявлнеых формах спротивляня ся выбракуваній реальности – той, што скланят до уніформізациі, пильнує обычайовых норм і лишат почутя змарнувамого часу. Світ обзераный з перспективы жытеля Руского Керестура – центра русиньской соспільности в сербскій Войводині. Рускопис был написаный по русиньскы, пак книжка была переведена і печатана в словацкым языку. В 2019 р. отримала найважнійшу словацку літературну нагороду в обшыри прозы – Anasoft Litera. Іван Медєші то выдатный русиньскій прозаік і поета з Руского Керестура. Окрем інчого был выріжненый і Премійом Александра Духновича за русиньску літературу.

Варштаты вышываня індпіруваны творчістю Новосільского

Публична Бібліотека в Рейоні Весола столичного міста Варшавы просит до участи в сусідскій ініциятиві з назвом «Вышываме штуку, котру маме в Весолій». То цикль варштатів для дорослых, інспіруваных штуком Юрия Новосільского. Основом будут мотивы, кольоры і формы присутны в поліхроміях і елементах выстрою костела в Весолій. Підчас штотыжньовых стріч участникы будут ся призерати тым формам і прібувати переносити іх на полотно. Пак, осіню, одбуде ся показ прац участників проєкту. Варштаты стартуют в найблизшу середу 6. мая. Пак будут проходити кажду середу, аж до кінця червця/юнія. Занятя сут безплатны і не треба мати досвідчыня. Треба лем ся перше записати, зато же єст ліміт доступных місц. Дрібниці о ініциятиві находят ся на фейсбуковым сайті подіі на профіли Публичной Бібліотекы в Рейоні Весола столичного міста Варшавы.