Сумар дня на 5. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 5. серпня/авґуста 2025 р.

Спецяльна ґрупа до справ реаґуваня в кризисовых ситуациях стрічы медведів і люди

Реґіональна Дирекция Державных Лісів в Коросні покликала ґрупу до справ реаґуваня в кризисовых ситуациях стрічы медведів і люди. Головном єй цілю єст протидіяня поступуючого явиска синантропізациі медведів тзн. пристосовуваня ся драпіжників до жытя в середовиску міцно зміненым людми. В склад ґрупы вошли лісникы, специялизуючы ся в еколоґіі медведів. До спілпрацы запрошено тіж представників наукового середовиска і репрезентантів жытелів. Покликана ґрупа буде полнива функцию операцийного і лоґістичного спертя в конфліктовых ситуациях, але буде тіж вела едукацийны і інформацийны проґрамы. Одраз по покликаню, ґрупа зачала дискусию над способом затриманя звірят в лісах. Експерты згодили ся, што медведі потрібуют в лісах спокою і ограниченого контакту з людми. Лісникы розважают введіня часовых заказів вступу до ліса в періоді ґавруваня. Додатковым фактором тримаючым медведі в лісах єст звекшеный доступ натурального ідла, што мож буде поправити через творіня дикых садів ци жеровых обшыри.

«Туристичны Скарбы Малопольщы»

Зачала ся сема едиция конкурсу «Туристичны Скарбы Малопольщы». Його цілю єст нагородити найбарже атракцийны, новаторскы і приязны для туристів місця. Конкурс складат ся з двох етапів. Першый тырвал буде до 18. серпня/авґуста і треба зголошувати кандидатуры. На сайті Малопольского Воєвідства находит ся анкєта, через котру мож зголосити кандидата, та цілый реґулямін і вымогы, котры мусит сполняти. Пак зачне ся другій етап конкурсу – інтернетове голосуваня, котре буде тырвало до 15. вересня/септембра. Як і в попередніх роках, змаганя пройдут в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині. Участ в конкурсі єст дармова, а для лавреатів сут фінансовы нагороды і участ в промоцийній кампаніі в 2026 році.

З року на рік Креницю одвиджат штораз більше туристів

Як передал бургомайстер Крениці, Пьотр Рыба, Креницю одвиджат штораз більше туристів а ключом до успіху было многє чысло атракций і культуровых ци спортовых акций орґанізуваных в першым місяци вакаций. Своі внескы операт на чыслі одпровадженой курортовой оплаты. В минулым році на початку серпня/авґуста было то коло 4 млн 900 тис. злотых, в тым році єст уж близко 5 млн 200 тис. злотых. Ведены діяня дают закладаный ефект і притігают новых туристів, а збільшене чысло приіздных перекладат ся на чысло новых інвестиций – будуваны сут наступны готелі і курорты.

Новый резерват на Підкарпатю – «Przełom Strwiąża»

В рамках проєкту «100 резерватів на 100 років Державных Лісів» в підкарпатскым воєвідстві одкрыют новый резерват природы «Przełom Strwiąża». Нова обшыр охороны буде рахувала коло 430 гектарів і злокализвана буде в Саноцко-Турчаньскых Горах, медже верХами Кычера і Кузьмин. То выняткова простір, богата в рідкы і хоронены ґатункы звірят, рослин і грибів. Особливе значыня має підорлик малый, для котрого вызначено дві охоронны зоны, як і чорный боцан з конкретном стрефом гніздуваня. Покликаный резерват буде 105 резерватом на Підкарпатю.