Сумар дня на 6. липця/юлия 2021 р.

Приносиме вам сумар медияльной ґрупы ЛЕМ.фм+ на ден 6. липця/юлия 2021 р.

Русины не нашли ся на списку корінных народів Украіны

Украіньскій парлямент не вызнал Русинів за корінный нарід. Верховна Рада Украіны 1. липця/юлия тр. схвалила пропозицию Закону о корінных народах Украіны. В законі тым за корінны народы Украіны вызнаны сут лем кримскы Татары, Караімы і Кримчакы – жыдівскє населіня, котре бесідує кримскотатарскым языком. Хоц закарпатска област Украіны достала ся до складу Украіны аж по ІІ світовій войні, а нарід, котрый домінувал на історичным Підкарпатю был все русиньскій, то в законі Русины вызнаны за корінный нарід не сут. До списку корінных народів так само не достали ся Ґаґаузы, про котрых єднак спомянуто в контексті будучых дописів до списку. Принятя закону о корінных народах Украіны, в котрым бракує Русинів, є лем продолжыньом долготырвалого потискуваня прав Русинів на Украіні. Украіна офіцияльно фурт не признає істнуваня Русинів. Русины як нацийональніст на Украіні сут вызнаны лем Закарпатском Областном Радом, рішыньом з 2007 рока.

Закрыты границі зо Словацийом

Вчера Словация закрыла граничны переходы з Польщом. Рішыня было выкликане збільшаючым ся на Словациі чыслом захворінь спричыненых вариянтом Дельта коронавіруса. Одкрытых остає лем дакілько переходів, м.ін. в Барвінку і Пивничній, на котрых обовязуют барже детальны контролі. Транзит через Словацию остає без змін. Од 9. липця/юлия для подорожуючых транзитом будут обовязувати специяльны «корытарі». Так само од 9. липця/юлия при вході на Словацию буде обовязувала 14-дньова кварантанна для осіб, якы не приняли вакцины проти COVID-19. Першый тест, якій завершыт кварантанну, буде мож зробити по 5 днях. Особы, якы переходят границю з огляду на роботу в сусідуючых державах, мают час приняти вакцину до 9. серпня/авґуста. По тым часі буде іх так само обовязувала кварантанна.

В Меджелабірцях одкрыли експозицию присвячену І світовій войні

В пятницю, 2. липця/юлия, одкрыли в Меджелабірцях експозицию присвячену І світовій войні. Находит ся она в Домі Культуры і є найвекшом того рода експозицийом на Словациі. В єй панельовій части находят ся основны інформациі о тым, як проходили боі в Меджелабірцях і околици. Велику част выставы творят запожычены ориґінальны артефакты. Як повіл для медий пріматор Владислав Вышньовскій, проєкт експозициі і одновы єдного з воєнных цмонтерів был уж в плянах од років. За його словами, ниґде на Словациі неє так великого чысла цмонтерів і павшых вояків як в окресі Меджелабірці. Простір про експозицию в Домі Культуры є подля пріматора дочасный. В плянах є будова окремого музею. В комбінациі з Музейом Модерной Штукы Енді Варголя мала бы ся тота тема причынити до розвитку туристичного руху в реґіоні.

Нова вакацийна оферта Бєщадского Нацийонального Парку

Бєщадскій Нацийональный Парк зрыхтувал на літні місяці нову оферту пн. «Вакациі 2021 з Бєщадскым Нацийональным Парком». В кажду суботу липця/юлия і серпня/авґуста будут проходити інформацийно-едукацийны акциі на пішых шляках пн. «По што, чом і як далеко?». В пятниці будут ведены занятя з працівником Парку для родин з дітми в Волосатым. Од віторка до суботы працівникы Парку просят до Волосатого на проєкциі фільмів і природничых діяпорам. Зас на суботу 7. серпня/авґуста сут плянуваны уродины Бєщадского Нацийонального Парку. На фейсбуковым профіли Парку неодолга мают быти поданы дрібницьовы інформациі про поєдны подіі. Вакацийна оферта Парку має ся постепенно пошырювати.