Сумар дня на 6. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 6. жолтня/октобра 2022 р.

Асфальту не буде

Протесты приносят жданы результаты. Так є в примірі плянів выасфальтуваня дорогы з Ясюнкы до Радоцины, яка веде м.ін. через Чорне. Припоминаме, што коли явила ся тота думка, скоро нашла ся ґрупа противників, яка зорґанізувала інтернетову петицию проти положыню асфальту в тым прекрасным фраґменті Лемковины. Петицию підписали 5654 особы. Як ся вказало, простест поміг, бо Державны Лісы, якы мали в плянах положыти асфальт, перед парома днями выцофали ся з той думкы. Інформацию потврдила тіж Малґожата Малух, війт ґміны Санкова. Ініцияторы петициі при нагоді алярмуют, што лісникы хотят выасфальтувати другій доізд до свого выпочынкового осередка в Радоцині – од пути зо Ждыні. Тота траса єст так само туристичні і природничо атракцийна, зато ініцияторы задеклярували підняти пробу бесіды на тоту тему з властями Державных Лісів. Цілю є очывидно сохраніня красы і природы Лемковины.

В селі Кружлів одсвяткували 200 років храму

Неділя, 2. жолтня/октобра, была в селі Кружлів, бардиівского окресу на Словациі завершыньом святкувань 200. річниці Грекокатолицкой Церкви Покровы Пресвятой Богородиці. Были они повязаны з посвячыньом храму, котрый перешол ремонт. Церков посвятил владыка Петро Руснак, апостольскій адміністратор sede vacante Пряшівской Грекокатолицкой Архієпархіі, братиславскій єпарха. Як раз в неділю проходил одпуст при нагоді праздника Покровы Пресвятой Богородиці, котрому є присвяченый храм в Кружльові побудуваный в 1822 р. Апостольскый адміністратор посвятил середину храму, як і новый ківот. Послідні реконструкциі храму были зроблены в 2021 і 2022. Кружлівскій храм был выремонтуваный завдякы фінансовій підпорі з розрахунку Пряшівского Самосправного Краю.

ПСК зреализувал ремонт доріг

Лишаме ся іщы на Словациі, де Пряшівскій Самосправный Край в старолюбовняньскым окресі зреализувал модернізацию дальшых 6,5 км доріг і двох мостів. На ремонтовы акциі выдал в сумі 1,6 млн евро. До хоснуваня оддано як раз пят ріжных трас, ремонт перешли і два 70-річны мосты в Старій Любовни і в селі Орябина. Фінализує ся модернізация долгой трасы третьой клясы в Орябині долгости більше як 1,3 км, долгой трасы дорогы третьой клясы долгости 1,2 км Орябина – Литманова. На путях в селах Орябина і Кремна по заливах зліквідуваный был аварийный став, новый асфальт має тепер 1,3 км трасы Нова Любовня-Колачків і Стара Любовня-Якубяны, де зремонтувало ся 1,4 км доріг.

Завершено ремонт підлогы церкви в Ґорлицях

Як інформує православна парохія Св. Тройці в Ґорлицях, остатнім часом завершено ремонт підлогы катедральной ґорлицкой церкви. В місце старой деревяной, положено нову підбудову, покладено інсталяцию підлогового огріваня і выложено підлогу мармуровыма плытами. З причыны скоро збільшаючых ся цін будовляных материялів, ци проблемів найти фаховців, інвестиция выдолжыла ся о 3 місяці. Парохія в комунікаті дякує вшыткым, якы помогли своіма жертвами і фізичном працом в проведеным ремонті. Окрем того, ґорлицка православна громада з взязку з выбухом войны на Украіні од початку была заанґажувана в активну поміч Украінцям. Парохія приняла на плебанію 17 осіб, головно матери з дітми. Завдякы дофінансуваню з Нацийонального Інституту Свободы повесло ся придбати ґастрономічне ґратя, через што парохія могла своі діяня кєрувати до шыршой ґрупы потрібуючых.