Сумар дня на 6. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 6. жолтня/октобра 2026 р.

135 років од народжыня Йосифа Бокшая

В пятницю 2. жолтня/октобра минуло 135 років од народжыня Йосифа Бокшая – маляря, педаґоґа і єдного з основателів Підкарпатской Малярской Школы. З той нагоды Закарпатскій Областный Музей Штукы ім. Йосифа Бокшая в Ужгороді приготовил выставу його творів. Експозиция представлят основны етапы творчости артисты, а значну єй част становлят працы тыкаючы сакральной темы. Святкуваня річниці зачало ся од положыня квітя на гробі Бокшая, а в рамках подіі одслужена была архієрейска Служба Божа. Йосиф Бокшай походил з Кобылецкой Поляны. В 1927 році разом з Адальбертом Ерделі основал Публичну Школу Малюваня, яка мала великє значыня для розвитку Підкарпатской Малярской Школы. Бокшай вмер в Ужгороді, де днес його імя носит Закарпатскій Областный Музей Штукы. Ювілейна выстава буде одкрыта до кінця жолтня/октобра.

Посвячыня обновленого Грекокатолицкого Катедрального Собору Покровы Пресвятой Богородиці в Дебречыні

В суботу 3. жолтня/октобра в Дебречыні одбыло ся посвячыня обновленого Грекокатолицкого Катедрального Собору Покровы Пресвятой Богородиці, котрый є катедром Гайдудорожской Архієпархіі і Мадярской Грекокатолицкой Митрополиі. Реконструкция храму проходила од 2023 року і обняла його інтерєр та екстерєр. Головным служытельом торжественной архієрейской Літургіі был Блаженнійшый Юссеф Абсі. В святкуваню взяли участ чысленны єпископы східнього обряду, серед них представникы грекокатолицкых Церкви з Мадяр, Словациі, Підкарпатя, Румуніі і ЗША. Присутный был м.ін. пряшівскій архієпископ митрополита Йона Максим, мукачівскій єпарха Теодор Мацапула та пітсбуржскiй архієпископ митрополита Вільям Скурла. Катедра была збудувана в неовізантийскым стилю і посвячена в 1910 році мукачівскым єпархом Юлийом Фірцаком. В 2015 році, по створіню грекокатолицкой митрополиі на Мадярах, храм стал катедральным собором Гайдудорожской архієпархіі. Реконструкция коштувала 2,5 млд форінтів. В рамках робіт обновлено будинок і літургічный простір, выполнено новый розпис в візантийскій традициі та одреставрувано захованы фраґменты первістного розпису храму.

Є так злi, што по озерi мож уж ходити

Драматично низкій рівен воды в Климківцi штораз сильнійше змінят краєвид околиці. Великы части дна резервуару были одкрыты, а в послідніх днях місце притягат много люди, котры ходят по теренах, што іщы донедавна были під водом. При актуальным рівни воды видно м.ін. давны дорогы і фраґменты терену затопленого при будові резервуару. Одкрывают ся тіж місця звязаны з давном лемківском Климківком, якой простір значучо ся змінил по збудуваню запоры. Ситуация є наслідством долготырваючого дефіциту воды. В вересни/септембрі Климківка осягнула історично найнизшый рівен, а резервуар уж долго тратит веце воды, як до него вплыват. Хоц одкрыте дно стало ся атракцийом для одвиджаючых, теперішній образ Климківкы предовшыткым показує скалю водной кризы.

«Łemkowie – opowieści w skrawkach» в Зеленій Горі

В пятницю 9. жолтня/октобра о 17.00 год. в Реґіональным Центрі Анімациі Культуры в Зеленій Горі одбуде ся наступна подія з циклю «Łemkowie – opowieści w skrawkach». В проґрамі нашла ся прелекция о лемківскій культурі і лекция лемківского языка. В варштатовій части участникы будут мочы тіж познати традицийны лемківскы співанкы і танці. Стріча одбуде ся в будинку Реґіонального Центра Анімациі Культуры при ул. Сєнкєвича 11 в Зеленій Горі.

«Чом ты, хмаро, заздростиш» – выстава Здобыляка