Сумар дня на 7. червця/юнія 2022 р.

Приносиме вам сумар медияльной ґрупы ЛЕМ.фм+ на ден 7. червця/юнія 2022 р.

«Два бескіды» – Біговый Фестіваль в Креници

Іщы лем нецілы 3 тыжні до початку Европейского Бігового Фестівалю, якій одбуде ся в Креници. Фестіваль пройде під гаслом «Два бескіды», бо заплянуваны трасы ведут так через Бескід Сандецкій, як і Низкій. В проґрамі подіі находит ся аж 7 зріжницюваных трас, так жебы каждый нашол дашто для себе. Найбарже вымагаючом, але тіж з найвысшом нагородом, єст «Креницка сотка», пак 60-кілометрова траса пн. «Ария Кєпуры», 43-кілометрова «Поворот Никыфора» і 20-кілометрова траса з закінчыньом на видоковій вежы. Для любителів спрінтів орґанізаторы зрыхтували скору уличну «Малопольску рекордову десятку». Сут тіж дві новости «Шалена єденадцетка» і «Яворина Vertical». Остатні три трасы будут добрым розвязаньом дла охочых, але не так досвідченых участників. Не бракне тіж атракций для наймолодшых. Вшыткы трасы своє закінчыня мают на креницкым дептаку. То гев буде серце цілого фестівалю, разом з атракциями, такыма як концерт, вечерня забава ци локальне ідло. Фестіваль пройде в остатній вікенд червця/юнія.

«В кругу лемківской культуры» – промоция лемківской культуры

До 17. червця/юнія в Саноку і Лупкові тырвают стрічы та варшататы посвячены лемківскій культурі, істориі і традициі. Орґанізатором подіі єст Фундация Центр Діалоґу Медже Реліґями та Народами. Проґрам направленый єст на осадженых з Карным Закладі в Лупкові, працівників закладу, діти і дорослых та особы з неполноспавностями і істориків. Підсумуваня проґраму пройде 17. червця/юнія, акция має наголовок «В кругу лемківской культуры». В часі стрічы мож буде послухати прелекциі м.ін. на тему лемківской культуры, віроісповіданя, істориі Лемків в Бєщадах і Низкым Бескіді ци облечынь. Додатковом атракцийом буде концерт лемківксых пісен ци выстава прац зробленых в часі проведеных скорше варштатів. Проєкт закінчыт ся выданьом електронной публикациі пн. «В кругу лемківской культуры», в котрій найдут ся дописы о Лемках, фотореляция з прелекций і варштатів ци рецептуры на лемківскы стравы.

Дві капличкы з Лемковины дочекали ся одновліня

Сут уж результаты конкурсу Малопольскы Капличкы 2022. Конкурс єст направленый на єдиниці територияльного самоуряду в малопольскым воєвідстві, якы піднимают консерваторскы, реставраторскы або будівляны працы при памятковых капличках находячых ся на обшыри малопольского воєвідства. Цілю конкурсу єст сохранити для будучых поколінь вартістны обєкты, што сут важным елементом культуровой спадковины Малопольщы. Того рока в рамках конкурсу територияльны єдниці одновлят 52 обєкты. Серед выбраных нашли ся тіж капличкы з Лемковины, єдна єст в ґміні Устя Рускє в селі Ганчова, а друга в ґміні Санкова в селі Бодакы. До той поры повело ся привернути давный блеск більше як 600 обєктів.

З Мушыны в Словацкы Татры

Ближат ся вакациі, час подорожы і одвиджаня. Жебы злегшыти туристам і зробити атракцийнійшы вакацийны подорожы вернуло желізницьове получыня з Мушыны до Попраду. Медженародный потяг курсує в каждый вікенд од 4. червця/юнія до 4. вересня/септембра 2022 р. Інакше як в зимовым періоді, тепер сут два курсы. Першый потяг іде з Мушыны перед 10.00 год., а другій перед 18.00. В доцільовым місци, в Попраді сут по 90 минутах. По дорозі мож буде высісти м.ін. в Старій Любовни, Подолинци ци Кежмароку. Назад тіж курсуют два получыня коло год. 9.00 і 17.00.