Сумар дня на 7. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 7. квітня/апріля 2020 р.

В Долині Костелиска побудуют Центр Природничой Едукациі Кіры

То уж певне. Нацийональный Татряньскій Парк до кінця 2021 рока выбудує Центр Природничой Едукациі Кіры. Буде ся він находил при початку єдной з найкрасшых і найчастійше одвиджаных татряньскых долин, при Долині Костелиска. На його будову передане буде близко 18 млн зл. Уж тепер власти парку передвидуют, же річні центр одвидит аж і 125 тис. туристів. Думаючы о як найменшій інґеренциі в середовиско і ландшафт, цілый будинок находил ся буде під земльом, та аж і дах вкрытый буде рослинами, што роснут в парку. На верху поставлена буде символична деревяна констукция навязуюча до пастырской колибы. В рамках діянь Центр Природничой Едукациі, окрем передаваня загальных інформаций о условіях на шляках, актуальных рослинах ци звірятах, якы можна там стрітити, полнил буде тіж едукацийну ролю. Для одвиджаючых зрыхтуваны будут тематичны салі, м.ін. саля «Очы темности», котра імітувала буде яскыню, ци «Як мышпергач», де одвиджаючы будут мусіти перейти лябіринт, хоснуючы ехолокацию.

На украіньскых граничных переходах новы рестрикциі

Новы рестрикциі на граничных переходах звязаны з пандемійом коронавіруса. Як поінформувала Головна Коменда Граничной Службы – од 7. квітня/апріля не буде можливый пішый рух на украіньскых граничных переходах. Згідні з рішыньом украіньскых власти жытелі Украіны, котры хочут вернути з Польщы до своіх хыж, але не мают своіх авт, будут мусіти вернути потягом або аеропляном. Окрем того рішено закрыти граничный перехід Гребенне-Рава Руска. Одкрыти будут переходы Дорогуск-Ягодин та Корчова-Краківец, де лишено можливіст руху для особовых авт і транспорт товарів. На тоту хвилю власти Украіны не поінформували, до коли тырвати будут ограничыня. Гранична Служба остерігат, же треба рахувати ся з можливыма трудностями звязаныма з поворотом на Украіну.

Дальшы рестрикциі на словацкых переходах

То іщы не єст конец інформаций з границ. Тепер дальшы рестрикциі звязаны зо словацкыма переходами. Пару днів тому Гранична Служба інформувала, же ґаздове, котры мают поля по словацкій страні, спокійні будут мочы ся до них достати. Скорше треба бы лем зложыти конечный внесок і ждати на згоду. Єднак од понеділька, 6. квітня/апріля, зо взгляду на Розпоряджыня Головного Сатнітарного Інспектора Словацкой Республикы ґаздове не будут мочы переходити границі на каждым переході. На тепер польско-словацку границю можна перейти лем на двох активных переходах – в малопольскым воєвідстві в Хыжным та в підкарпатскым в Барвінку.

«Лемковина. Час войны і миру»

Выдавництво Лібра інформувало, же доступне єст нове і дополнене выданя книжкы Станіслава Криціньского пн. «Лемковина. Час войны і миру». То друга част тзв. лемківской трилоґіі. Оповіданя зачынат ся в 30. роках ХІХ ст. і веде чытача аж до 1939 р. Криціньскій представлят м.ін. народины народового руху серед Карпатскых Русинів ци презентує біоґрафіі вызначных лемківскых діячы і політиків тамтого періоду. Не бракує в публикациі тіж богатых описів початків лемківской літературы, подій Великой Войны і репресий, котры впали на лемківскы еліты, якы были поневолены в лаґрі в Талергофі. Автор книжкы не поминул тіж політичных і реліґійных тем – сут м.ін. описы Руской Народной Республикы Лемків, конверсиі до православя ци борбы з одходжыньом вірных. Книжка вказує тіж штоденне жытя на лемківскых селах в меджевоєнным періоді. Станіслав Криціньскій в своіх публикациях описує історию Лемковины, але тіж Бєщады ци Погіря. Окрем лемківской трилоґіі написал м.ін. «Деревяны церкви в Карпатах» ци «Бєщады. Історично-краінознавчый словник».