Сумар дня на 7. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 7. квітня/апріля 2021 р.

Асистуване списуваня продолжує на Словациі

31. марця закінчыл ся електронічный етап списуваня жытелів на Словациі. Тепер продолжує асистуване списуваня. На пресконференциі 6. квітня/апріля представникы Статистичного Уряду Словацкой Республикы інформували о результатах самосипису. Подля даных з електронічного списуваня, самосписало ся аж 86% жытелів державы, чого аж і не сподівал ся уряд. Найактивнійшы были в електронічным списуваню в жыліньскым краю, де ся самосписало 92% жытелів. Найменше активны были на східній Словациі, де самосписало ся: 83% жытелів в пряшівскым краю і лем 79% в кошыцкым краю. Асистуване списуваня потырват до 31. жолтня/октобра тр. Першы оціны результатів будут публикуваны кінцьом календарного рока.

Наслідства пандеміі серед меншын

На інтернетовым сайті Выділу Психолоґіі Варшавского Університету доступны сут рапорты з досліджынь тыкаючых влияня пандеміі коронавіруса на психіку ріжных соспільных ґруп. Поміщено там і 4. рапорт з досліджыня пн. «Наслідства пандеміі серед меншын і іміґрантів», проведеного в минулым році серед меншыновых ґруп: Лемків, Вілямівян, Кашебів, Шлезаків, іміґрантів з Украіны і корінных ґруп в Мексику. Лемкы, котры взяли участ в проєкті, найрідше деклярували стиґматизацию звязану з пандемійом. Шлезакы найчастійше зголошували дискримінацию, в тым почутя, же сут трактуваны як загорожыня. Так як шлезска і кашебска меншыны, Лемкы вказували на страх пред втратом роботы або зменшыньом приходів, але інакше як другы ґрупы – не в звязку з досвідом быти дискримінуваным. Дальшы анализы будут тыкати м.ін. потенцияльных факторів, якы позитивно влияют на добростан і здоровля осіб з меншыновых ґруп.

Рада Европы вызвала Словацию підпорити меншыновы языкы

Рада Европы вызвала Словацку Республику збільшыти підпору меншыновых языків на своій териториі. Інформация походит з опубликуваной 31. марця тр. Справы о введіню пильных рекомендаций з пятого кола моніторуваня рівня імплементациі Европейской карты реґіональных або меншыновыя языків на Словациі. Комітет подал в документі, што не достал од словацкых власти достаточных інформаций в примірі аж девятьох языків, в тым русиньского. Власти не інформували і о консультациях з Выбором про Нацийональны Меншыны і Етнічны Ґрупы або з окремыма меншынами. Комітет подал, што в обшыри урядовой аґенды не старчыт зменшыти ліміт з 20% до 15% жытелів нацийональной меншыны в селах і містах, кєд іде о будучу аплікацию закону о хоснуваню языків нацийональных меншын. Єдночасно комітет позитивно оцінил публикацию приписів о вчыню вчас пандеміі та основных інформаций і наряджынь в меншыновых языках.

Віртуальна прогулька по Конечній

В рамках факультативного блоку Приближыня: Лемковина на стыку культур, реализуваного студентами европейской комунікациі на Університеті Адама Міцкєвича в Познані, пройде заран двогодинна віртуальна прогулька через лемківску Конечну. О селі оповіст др Ігор Ксенич з Інституту Европейской Культуры УАМ. До прогулькы мож долучыти заран о годині 10.15 через фейсбуковый сайт факультету.