Сумар дня на 7. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 7. квітня/апріля 2022 р.

«Кычера і єй гості для Украіны»

В найблизшу суботу, 9. квітня/апріля, в Ліґници одбуде ся концерт під назвом «Кычера і єй гості для Украіны». Через выступы артисты хотят вказати солідарніст з Украіном і украіньскыма громадянами, якых каждого дня прибыват в Ліґници. Окрем ЛАПіТ «Кычера» і «Кычерка» выступлят і інчы лемківскы ґрупы і артисты. На сцені в Рыцарскій Академіі в Манежовій Сали выступлят н’лем folk, Гылля та солисты Роман Гавран і Наталия Бернацка. Конерт є орґанізуваный при спілпраци Міста Ліґниця і Ліґницкого Центра Культуры. Початок о 16.00 год. Треба доповісти, што окрем того концерту ансамбль Кычера пару остатніх дни орґанізувал своі выступліня в пунктах, де тепер находят ся біженці.

Ропа в Климківці?

В вітіркове пополудне пожарникы і поліция мусіли інтервеніювати на штучным водным резервуарі Климківка. Зголошыня пришло по 17.00 год. о тым, што в озері находит ся ропоподібна субстанция. На місце одраз подала ся єдиниця пожарників з Устя Руского. До акциі был призначеный і колектив пожарників з лодком з Ґорлиц. На місци была забезпечена млака – найпевнійше то олій. Побрали пробкы в ціли анализы субстанциі в лябораториі. На жаль, єдном з гіпотез є, што просто хтоси вылял олій на берег озера. Фактом тіж є, што штучный залив на Климківці є занечыщеный і інчым смітьом, котрого з рока на рік прибыват.

Ремонт лемківской хыжы в Завадці Рыманівскій

О кілько не трафит ся нич, што непередвиджене, то зараз по Великодни – за григорияньскым календарьом, зачне ся ремонт лемківской хыжы в Завадці Рыманівскій, котра полнит функцию туристичной колибы, яку обслугує Студентскій Кружок Бескідскых Провідників з Люблина. Ремонт потырват коло місяця. Роботы будут тыкати выміны даху – стягнут етерніт, зміцнят конструкцию даху, класти будут нове вкрытя, зроблят окутя, рынны, выкінчыня, одтворят тіж даховы рысі, значыт высунены поза рант стіны фраґменты строповой белькы, котры полнят функцию підпертя шырокого окапу даху. Вчас робіт буде можніст переночувати в хыжы, але треба рахувати ся з невыгодами. Опікуны колибы одраджают приізду з дітми, з молодшыма туристами просят аж по 20. мая, значыт по скінчыню робіт.

Одтепер Нацийональный Парк Полонины буде більшый

Десяткы років недоступный для люди обєкт «Ґрофскы хыжкы» над селом Новоселиця на териториі Нацийонального Парку Полонины, за социялизму хоснуваный функцийонерями на полювачкы, в тогорічным літнім сезоні отворят для люди. Обєкт під Справу Полонин перешол од 1. квітня/апріля в рамках реформы нацийональных парків од Лісопольносподарского Маєтку Улич і бывшый тзв. «міністерскій» ревір. Справа вірит, же област стане ся облюбленом туристичном дестинацийом. Місце находит ся в атракцийній долині Збойского Потока од села Новоселиця по Рябу Скалу. Ареал творит хыжа полювачів, рыбник На Млаках і лукы Медовой бабы з пчолином.