Сумар дня на 7. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 7. квітня/апріля 2025 р.

Підписане догваріня з выконавцьом проєкту модернізациі одтинка ДД28 з Ропы до границі воєвідств

Ґенеральна Дирекция Державных Доріг і Автострад інформує о підписаню важного догваріня на прирыхтуваня проєкту модернізациі одтинка державной дорогы нр 28. Іде о дорогу медже Ропом і границьом малопольского і підкарпатского воєвідств, долгу на 17,5 км. Кошт прац то 8,6 млн злотых. Розбудова державной дорогы має іти по істнуючым сліді. Головна ціль то поправа безпекы кєруючых і пішых. В плянах єст і перебудова мостів, будова автобусовых заток, тротуарів і роверовых стежок. Задачом выконавці буде запроєктувати розбудову трасы, достати середовискове рішыня і позволіня на будову. Має на тото неціле 4,5 рока.

Лісникы і службы консервациі памятників Підкарпатского Воєвідства підписали порозумліня

В віторок 1. квітня/апріля в сідибі Надлісництва Рыманів прошла стріча, на котрій сформализувана была спілпраца лісників зо службами консервациі памятників Підкарпатского Воєвідства. Порозумліня підписали Мариян Піґан, директор Реґіональной Дирекциі Державных Лісів в Коросні і Адам Сапета, Підкарпатскій Воєвідскій Консерватор Памятників. В стрічы взяли участ і шефове делеґатур Консерваторского Уряду з Ряшова, Коросна і Тарнобжеґу, специялисты з обшыри археолоґіі і документациі памятників, надлісничый Надлісництва Рыманів та робітникы Реґіональной Дирекциі Державных Лісів в Коросні, звязаны з охороном культурной спадковины. На стрічы представлены были обшыри заінтересуваня консерваторского уряду та ріжнорідніст памятковых обєктів, якы находят ся в лісах. Підписане порозумліня закладат спілпрацу тіж на поли популяризуваня знаня о культурній спадковині та вырпацуваня метод охороны археолоґічных памятників з увзглядніньом можливости ведіня лісовой господаркы. Стороны будут тіж спілпрацувати над розпознаньом чысла і розміщыня памятників, якы находят ся в лісах, котры сут надзоруваны Реґіональном Дирекцийом Державных Лісів в Коросні. В плянах будут тіж спільны проєкты і діяня едукацийного характеру. Дрібниці чытайте в дописі на нашым портали.

”Периферийна єпархія. Православна перемышльска єпархія до 1596 рока” – стірча з автором

В найблизшу пятницю 11. квітня/апріля в Перемышли одбуде ся авторска стріча з др Яцком Крохмальом, на якій буде запрезентувана публизкация пн. ”Периферийна єпархія. Православна перемышльска єпархія до 1596 рока”. Книжка была печатана Головным Архівом Давных Акт. Стріча пройде в сідибі Державного Архіву в Перемышли. Початок о 11.00 год.

Варштаты малюваня яєц в Рускій Бурсі

Припоминаме, што уж в найблизшу неділю в Рускій Бурсі в Ґорлицях, одбудут ся варштаты малюваня яєц. Традицийні стрічаме ся в Квітну Неділю, яка того рока выпадат 13. квітня/апріля. Варштаты зачнут ся о 15.00 год. Орґанізаторы забезпечают материялы – будут на Вас чекати: зварены яйця, фарбы і воск до малюваня. Вчас спільной стрічы продолжана буде традиция рыхтуваня великодніх писанок батіковом методом – розтопленый воск наносит ся на верхню верству яйця, хоснуючы метальовый писалец з головком. Вступне очывидно дармо. Красні просиме!

Джерело фотоґрафіі: Ґенеральна Дирекция Державных Доріг і Автострад (GDDKiA)