Сумар дня на 7. липця/юлия 2023 р.

Приносиме вам сумар медияльной ґрупы ЛЕМ.фм+ на ден 7. липця/юлия 2023 р.

Рушат ХІІ Русиньска Ватра в Малым Липнику

Уж днес початок ХІІ Русиньской Ватры в Малым Липнику. Вятряный проґрам заплянуваный єст на три дни. Полный проґрам найдете м.ін на фейсбуковым сайті головного орґанізатора – общества Молоды.Русины. На днес на 19.00 год. заплянувана єст школа народного співу з Іваном Брільовом. Днес і заран буде мож тіж взяти участ в школі народного танця, де ся буде мож навчыти танців з русиньскых сел Якубяны і Камюнка. Днешній ватряный ден завершыт концерт – вечер русиньскых голосів. Музичны выступы і тематичны проґрамы будут продолжати в суботу од год. 16.30. На конец, пізным вечером, одбуде ся розпаліня великой ватры з круговыма танцями. Для діти зрыхтуваны сут активности з акторами з Театру ім. А. Духновича з Пряшова і співачком Домініком Новотном. Окрем выміненого в суботу пройде бесіда з фольклористком і зберательком кроів Доміником Сакмаровом про специфіку спишскых і шаришскых парт і презентация публикациі «О угорскых Русинах». Не бракне і презентациі реґіональных страв поєдных сел. В неділю по грекокатолицкій літургіі одбуде ся концерт духовной музикы.

LXXXI засіданя СКУтНіЕМ

В середу, 5. липця/юлия, одбыло ся другє в тым році, 81. засіданя Спільной Комісиі Уряду та Нацийональных і Етнічных Меншын. Спілведучыма стрічы были віцеміністер Блажей Побожый і др Григорий Куприянович. Присутны были і віцеміністер едукациі і наукы Дариюш Пьонтковскій і віцеміністер Анна Шмідт – полномічна уряду дс. рівного трактуваня. Омовлены были м.ін. квестиі тыкаючы формальной едукациі меншын і механізмы творіня і формуваня авдиций для меншын в публичных медиях. Представлены были і детальны правила поступуваня при уділяню дотаций, на реализацию в будучым році задач маючых на ціли охорону, захованя і розвиток культуровой достоменности нацийональных і етнічных меншын і захованя реґіонального языка. Як подал віцеміністер Внутрішніх Справ і Адміністрациі, хотіли бы в векшій як актуально ступени влучыти в працы Спільной Комісиі полномічных воєводів дс. нацийональных і етнічных меншын. Полномічны будут тіж, затля в пілотажовій формі, брати участ в процесі оціны оферт о уділіня дотациі. Комісия бесідувала і о працах над ІХ Рапортом тыкаючым ситуациі нацийональных і етнічных меншын і реґіонального языка в Польскій Республиці.

«Потяг до культуры» в саноцкых музеях

Історичный Музей в Саноку і Музей Народного Будівництва в Саноку долучыли до акциі «Потяг до культуры», орґанізуваной Маршалком Підкарпатского Воєвідства і реазлизуваной спілком Реґіональны Перевозы. Завдякы тому пасажеры потягів реляциі Ряшів – Меджелабірці – Ряшів в періоді од 1. липця/юлия до 31. серпня/авґуста тр. мают можливіст дармо видіти оба вымінены музеі, як і пару інчых музеів в реґіоні. Білет на реченый потяг позвалят безплатно видіти експозицию Історичного Музею і обєктів Музею Народного Будівництва в терміні трьох дни од даты переізду. Оферта єст скєрувана так до жытелів Підкарпатя, як і туристів одвиджаючых тот реґіон.

«Лемківскій Триптих» в Бортным

Припоминаме, што заран, 8. липця/юлия, в Бортным пройде вернісаж выставы пн. «Лемківскій Триптих». Буде то выстава фотоґрафій авторства Яцка Косібы. Презентувана буде до кінця серпня/авґуста в просторах грекокатолицкой церкви св. Космы і Даміана в Бортным, яка тепер є музейным обєктом Музею Дворы Карвациянів і Ґладышів в Ґорлицях.