Сумар дня на 7. липця/юлия 2026 р.
Приносиме вам сумар медияльной ґрупы ЛЕМ.фм+ на ден 7. липця/юлия 2026 р.
Ремонт дорогоы Ждыня – Радоцина
Вiйт ґміны Устя Рускє інформує, што в звязку з ремонтом ґмінной дорогы Ждыня – Радоцина, в днях 7. і 8. липця/юлия дорога буде заперта для руху авт. Днес переiзду не буде од 7:00 до 18:00 год., а заран од 7:00 до 13:00. До Радоцины доiхаме через ґмінны і повітовы дорогы, через Ґладышів, Криву, Ясюнку і Чорне.
Одкрыто памятник Едмундови Еґанови
1. липця/юлия в містi Загонь на Мадярах одкрыто памятник Едмундови Еґанови, котрый был реформатором, важным персонажом в істориі реґіону, якiй записал ся і до істориі Русинів. Церемонія одкрытя памятника зобрала представників місцевого самоуряду, культурных орґанізаций і мешканців.
Едмунд Еґан брал участ в реализациі Верховиньской акциi, котра была направлена на економічный розвиток русиньскых комітатів, то є земель де жыли Русины, модернізацию, розвиток освіты серед місцевого населiня і поліпшыня условій жытя в карпатскым реґіоні. Памятник має нагороджати його діяльнiст і припоминати о його влияню i роботi зробленiй для спільноты Підкарпатской Руси.
Літні варштаты в Музею Дворы Карвациянiв i Ґлaдышiв
Музей Дворы Карвациянiв i Ґлaдышiв в Ґорлицях запрашат на літні варштаты, котры онедолга одбудут ся в його філиях:
В Мазярскій Загороді в Лоси пройдут едукацийно-плястичны варштаты «Струганы і малюваны», інспіруваны традицийныма народныма грачками в формі звірят. Участникы ручнi приготовлят кольоровы фіґуркы, котры будут ориґінальном памятком з одвиджыня музею. Варштаты одбудут ся 14. і 21. липця/юлия та 11. і 18. серпня/авґуста.
В Скансені Погіряньского Села в Шымбарку заплянуваны сут дві акциі. Перша то варштаты заплiтаня лозины, підчас котрых участникы познают традициі того ремесла i основны технікы плетіня з лозы. Каждый участник сам приготовит невелику декоративну роботу. Варштаты одбудут ся 8., 15. і 23. липця/юлия. Друга пропозиция то «Пчолярскы варштаты», котры приближат історию бортництва і пчолярства на Погірю. Участникы дознают ся о роли пчіл в природі та о iх значыню для захованя рівновагы екосистему. Занятя одбудут ся 12., 19. і 26. серпня/авґуста.
Будучы культурны подii
Припоминаме, што уж за пару дни, в пятницю 10. липця/юлия зачне ся ювілейна 15. Русиньска Ватра в Малым Липнику, котра тырвала буде до 12. липця/юлия. Заінтересуваных iнформуєме, што до Липника з польской стороны мож ся достати не лем од Старой Любовні, а тiж роверовом лавком, яка переходит над Попрадом в селi Анриiвка, недалеко желiзничной станциi.
В тот сам вiкенд од 10. до 12. липця/юлия проходило буде XXXVI Православне Поломництво на Святу Гору Явір. Поведе шляком Повороту Лемків до Православія – од Тылявы через Святкову Велику, Свіржову Руску, Бортне, Баницю, Вірхню, Ґладышів, Смерековец, Квятон, Шквіртне, Ганчову і Высову. На конец в неділю 12. липця/юлия о 10.00 год. буде правлена Літургія на Святiй Горi Явір.
Наконец припоминаме о кус дальшiй подii, яка одбуде ся в днях од 31. липця/юлия до 2. серпня/авґуста, то значыт, о XLVI Лемківскiй Ватрi на Чужыні в Михаловi. На тот рiк орґанiзаторы приготовили вельо атракций i новых подiй, такых як, напримiр, лicовы купелi, танцювальны варштаты, рандкы, буде і стрефа спорту. Інформациi можете найти на фейсбуковым i iнстаґрамовым профiлях Ватры.
Фот.: К.Новак
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
