Сумар дня на 7. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 7. листопада/новембра 2024 р.

Опера «Голос» штораз ближе

Припоминаме, што ближыт ся премєра лемківской оперы «Голос». Уж 24. листопада/новембра в Нацийональным Форум Музикы во Вроцлаві будут одограны два спектаклі – о 16.00 год. і 18.30 год. Неодолга мают быти доступны білеты. «Голос» то проєкт композиторкы Дариі Кузяк, якій лучyт в собі сучасну музику з лемківском народном музиком і електроніком. Опера оповідат про дві сестры, котры розділила доля, а туга пхат іх в свою страну. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Разом в творіню лемківской оперы возме участ близко 60 осіб. Деталі о приготовліню до оперы, як і дальшы інформациі о ній можете слідити на файнпейджы в сіти Facebook.

Выстава творів Павла Марковича

В Выгорлятскым Музею в Гуменным одбуде ся в четвер 7. листопада/новембра вернісаж выставы під назвом «Павел Маркович – выбір з творчости». Выстава є присвячена Русинови з Чертіжного, меджелябірского окресу. Одбуде ся она з нагоды сотной річници од народжыня автора. Експозиция буде вказана в просторах Ґалерийной салі Ореста Дубая Выгорлятского Музею. Выставу буде мож видіти до 8. грудня/децембра. Творец і педаґоґ Павел Маркович записал ся до відома фаховых і лаіцкых кругів як «вынятковый пейзажыста, котрый позорно, аж етноґрафічно захоплювал характеристикы народной архітектуры і цивілизацийны переміны сельского оточыня на східній Словациі» – пише орґанізатор ку выставі. В рамках выставы буде мож видіти олій, темперу, сухій пастел, комбінувану техніку і лінорыты. Выставлюваны творы выникли медже роками 1965-1983.

Пряшівска конференция меншыновых языків

Проблематика языків нацийональных меншын і з тым повязаный рівен едукациі на Словациі был темом дводньовой медженародной конференциі пн. «Меншыновы языкы і шкільництво на Словациі: Істория, днешній стан і перспективы». В тых днях конференцию зорґанізувал Центр Языків і Культур Нацийональных Меншын Пряшівского Університету. В рамках лекций выступило много люди з Пряшівского Університету, але і з інчых інституций, медже нима наприклад проф. Павло Роберт Маґочій. Конференция окрем інчого заміряла на выміну поглядів, інформаций і імпульсів ку сучасному станови языків нацийональных меншын Словациі.

Крадіж Варгольовых творів

До дост нештоденного вламаня дошло в Нідерляндах. Злодіі схоснували могучый експлозийный ладунок, жебы розбити входовы двері до ґалериі MPV в Ойстервейк в провінциі Пілнічна Брабанция. Там вкрали дві ґрафікы з сериі серіґрафік Енді Варголя. Злодіі прібували вкрасти вшыткы штырі творы з сериі Варголя з 1985 рока з колекциі Reigning Queens. В збірку входят портреты товдышніх владарок Зъєднаного Королівства, Нідерляндів, Даніі і Суазі, котре тепер зове ся Есватіні. Конец кінцьом злодіі вкрали образы, якы представляют королеву Єлизавету ІІ і королеву Маргариту з Даніі. Два дальшы портреты з сериі – портрет королевы Беатрікс з Нідерляндів і королевы Нтомбі Тфвалі з Есватіні лишыли на улици. Серіґрафікы были зроблены в 1985 році, два рокы перед смертю Варголя. Кінцьом того місяця образы мали быти выставлены на продаж на торгах штукы в Амстердамі.