Сумар дня на 7. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 8. жолтня/октобра 2026 р.

Стежка слідами Русинів і Енді Варголя – іхайте на Пряшівску Русь

На Пряшівскій Руси урухомили едуакцийну стежку слідами Русинів і Енді Варголя. Трасну під назвом «Край Русинів і Енді Варголя» одкрыли в місцевости Габура. Єй задачом єст промувати русиньску культуру, природу Низкых Бескідів, історию реґіону і самого Варголя. Стежка чыслит около два кілометры і подумана єст як атракция тіх для родин з дітми. Траса веде од реплікы деревяной церкви в Габурі, через верх Климів, якій находит ся на граници Габуры і Миковой, де вродили ся родиче Енді Варголя. На трасі находят ся інтерактивны едукацийны елементы, котры приближают історию Русинів, еміґрацию родины Варголів до Зъєднаных Штатів Америкы ци історию выдобытя ропы. Туристы можут хоснувати моделі до дотыканя, чытати інформациі поданы на едуакцийных таблицях і обзерати інсталяциі, котры вказуют природничы процесы. Нова атракция має заохотити тых, котры придут видіти новодкрытый Музей Енді Варголя, жебы долше остали в реґіоні. В Габурі окрем церкви мож видіти на примір памятник Князя Лабірця, а в Красным Броді – стародавный Монастыр Сошествія Святого Духа.

Успіх стражаків в Ґладышова. Ґратулюєме!

Молоды стражакы з Ґладышова нашли ся в ґрупі лавреатів загальнопольского конкурсу. Представникы Молодіжной Протиогньовой Дружыны в Ґладышові одобрали нагороду підчас торжественной ґалі конкурсу «Будуєме Систем Соспільной Одпорности», яка прошла в Школі Аспірантів Державной Протиогньовой Стражы в Кракові. Молодіжна Протиогньова Дружына Ґладышів нашла ся серед 60 лавреатів малопольского воєвідства. Выріжніня єст доказом узнаня для заанґажуваня молодых другів в діянях для безпекы і локальной спільноты. Нагороды вручали представникы державной адміністрациі і мундуровых служб. В подіі участ брали медже інчыма віцепремєр і міністер обороны Владислав Косіняк-Камиш, представникы Міністерства Внутрішніх Справ і Адміністрациі, Державной Протиогньовой Стражы і малопольскій воєвода Кжыштоф Ян Кленчар. Як підкриляют другы Протиогньовой Дружыны в Ґладышові, выріжніня потверджат, што активніст і робота молодежы сут достеріганы і доціняны шырше, як лем локальні. Стражакы ґратулюют молодым членам дружыны і дякуют за заанґажуваня і детермінацию.

Презентация лемківской ораториі в Познані

В найблизшу неділю 11. жолтня/октобра в Архікатедральній Базилиці Святых Апостолів Петра і Павла в Познані одбуде ся концерт з нагоды Папского Дня. В проґрамі єст світова премєра першой лемківской ораториі «Вшыткы воды» Норберта Палея. Запрезентуваны будут композициі Яна Себастияна Баха, Вілияма Ґомеза та спомненого Норберта Палея і Давида Дутканича пн. «Трены Талергофу» і Дариі Кузяк «Вчера была дівка». Орґанізатором концерту єст Фундация Арс Актіва гушляря Мариюша Мончака, якій буде єдным з выконавців концерту. Концерт одбуде ся в рамках ґранту реализуваного з середків Міністра Культуры і Нацийональной Спадковины з проґраму «Языкова ріжнорідніст» Інституту Языковой Ріжнорідности Польщы.

Одышол Станіслав Гібнер. Артиста звязаный з ґорлицком земльом

Не жыє Станіслав Гібнер, заслуженый артиста звязаный з ґорлицком земльом. Маляр, фотоґрафік, любитель Низкого Бескіду і гірскій ратівник, вмер на 95 році жытя. Станіслав Гібнер вродил ся в 1931 році в Лібушы, вельо років звязаный был з ґорлицкым Ґлініком, ПТТК і ҐОПР-ом. Артиста был знаный головні як автор акварель і фотоґрафій представляючых краєвиды нашого реґіону. Малювал церкви, костелы, деревяну архітектуру, природу, фраґменты Лемковины. Роботы Станіслава Гібнера вказувано на выставах в Польщы і за границьом. Был лавреатом артистичных нагорід Міста Ґорлиці ци новосандецкгоо воєвідства. Был одзначеный м.ін. Срібрным Крестом Заслугы.