Сумар дня на 8. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 8. червця/юнія 2020 р.

Днес зачаток матур

Уж днес в Польщы зачынают ся матуральны іспыты. З причыны пандеміі коронавіруса еґзамінуваных і комісиі обовязуют специяльны принципы безпекы. Еґзаміны пройдут лем в писемній формі. На матуральный іспыт можут прити лем здоровы особы, якы не мают симптомів коронавіруса. Так само не можут в ним брати участи особы будучы в ізоляциі або в кварантанні. Тыкат ся тото так матуристів, як і членів еґзамінацийной комісиі. До моменту входу на еґзамінацийну салю і занятя вызначеного місця матуристы мусят мати на собі масочкы, або в інчый спосіб закрыти ґамбу і ніс. Перед входом еґзамінуваны мают тіж тримати безпечный дистанс і уникати безпосередніх контактів з інчыма. На просьбу особы, яка буде впущала матуристів до салі, треба буде стягнути маску на бороду і вказати лице цілю ідентифікациі. Сам іспыт проходит без обовязку закрывати ґамбу і ніс. Члены комісиі мусят накладати маскы, коли ходят по сали, єднак можут іх зняти в вызначеным місци, дотримуючы безпечный дистанс. За каждым разом коли матуриста буде хтіл выйти до тоалеты, звідати о дашто еґзамінуючого, або скінчыт еґзамін і буде хтіл выйти, мусит наложыти маску. При вході до школы повинны ся находити плыны до дезинфекциі. Вшыткым тогорічным матуристам желаме вельох успіхів.

Потягом до Вроцлавя, Загіря…

Помалы будут вертати желізницьовы получыня. Од 14. червця/юнія з Ґорлиц штоденно о год. 8.11 буде курсувал потяг TLK Погіря, якій іде з Вроцлавя до Загіря. В другу сторону, потягом TLK Погіря реляциі Загіря-Вроцлав, буде мож іхати о год. 20.57. Пополудни в неділі зо стациі поіхат тіж склад Малопольской Желізниці до Ясла. В пятниці будут тіж ходити получыня Regio з Ряшова до Ґорлиц і з Ґорлиц до Ясла. Тіж в пятниці будут ся в Ґорлицях затримувати потягы Малопольской Желізниці: Губаль з Кракова до Ясла і з Ясла до Нового Санча.

Рушыла рекрутаиця до Православной Духовной Семінариі в Варшаві

Зачала ся рекрутация до Православной Духовной Семінариі в Варшаві. Канцелярия Митрополиты передала необхідны інформациі тыкаючы рекрутациі на першый рік студиів в Семінариі в академіцкым році 2020/2021. Рекрутация проходит в двох термінах: першый до 30. серпня/авґуста, другій до 20. вересня/септембра. Студенты будут приниманы до семінариі на основі конкурсу свідоцтв. На сайті Православной Духовной Семінариі (psd.edu.pl) можете найти листу документів, якы треба передати, жебы старати ся о місце в Семинариі.

Молили ся в інтенциі нацийональных і етнічных меншын

Вчера, 7. червця/юнія, в римокатолицкій катедрі в Ополи правлена была служба в інтенциі нацийональных і етнічных меншын. Была она завершыньом Поломництва Нацийональных і Етнічных Меншын, якє проходило того же дня. Зо взгляду на пандемію подія не прошла як што рока на Горі св. Анны, але як раз в опольскым храмі. Службу очелювал єпископ опольскій Анджей Чая. Прямый перенос мож было обзерати в TVP 3 Opole і в сервісі YouTube. Была то уж 25. едиция подіі.