Сумар дня на 8. липця/юлия 2026 р.

Приносиме вам сумар медияльной ґрупы ЛЕМ.фм+ на ден 8. липця/юлия 2026 р.

Урядникы дискутували о справах ґорлицкого повіту

Вчера в ґорлицкым ратушу одбыла ся стріча з малопольскым воєводом Кшыштофом Кленчаром, котра посвячена была найважнійшым справам, якы тыкают локальных самоурядів. В бесідах участ взяли представникы Союзу Ґмін Ґорлицкой Землі, в тым ґорлицкій староста Мирослав Вальонґ. Стріча была нагодом, жебы омовити основны квестиі, што звязаны зо спілпрацом урядовой адміністрациі з самоурядами та з выміном інформаций на тему плянуваных і реализуваных інвестиций. Дискутувано о кєрунках розвитку реґіону, можливости здобываня середків на черговы ініциятивы і о выкликах, з якыма наштоден міряют ся урядникы. Важным елементом бесід было представліня потребы місцевых люди, вказано пріоритеты для дальшого розвитку інфраструктуры, поправы якости публичных услуг і підношыня комфорту жытя мешканців ґорлицкого повіту.

Основали Зґрупуваня Територияльной Спілпрацы Выгорлят

Пряшівскій і Кошыцкій Самосправны Краі та украіньскій партнер – Закарпатска Областна Рада підписали в понедільок 6. липця/юлия Европейскє Зґрупуваня Територияльной Спілпрацы Выгорлят. Є то перше такє словацко-украіньскє зґрупуваня свого типу і лем другє в рамках Европейской Уніі. Його цілю є розвиток приграничной обшыри, будуваня взаімного довіря і стабілизация реґіону. Зґрупуваня Выгорлят уможливит стараня ся о еврофодны і грошы з інчых медженародных джерел. Першом задачом того зґрупуваня має быти выпрацуваня стратеґіі розвитку в окремых обшырях і на єй основі список пріоритетовых проґрамів і проєктів, та часовый і фінансовый гармоноґрам. Пристуны підчас підписаня основаючых документів были: жупан Пряшівского Самосправного Краю Мілян Маєрскій, жупан Кошыцкого Самосправного Краю Растіслав Тырнка, а за украіньску сторону Роман Сарай. Товаришыли ім представникы дипломатичных корпусів.

Дороговы роботы в Ґорлицях

В Ґорлицях рушыли роботы звязаны з будовом нового дорогового лучника медже улицьом Януша Корчака а улицьом ґенерала Юзефа Галлера. Выконавця веде початковы роботы, якы обнимают головні вытинку дерев. Будова новой дорогы то єдна з найвекшых дороговых інвестиций реализуваных в тій части міста. Інвестицию реализує фірма STRABAG, а єй кошт то 7 млн зл. Закрес робіт єст шырокій – обнимат не лем будову новой дорогы, але зробліня полной технічной інфраструктуры і загосподаруваня терену. Зроблят асфальтувану дорогу з двома пасами руху о шырокости по 3 метры каждый, два скрижуваня, пішникы, побоча та публичны і індивідуальны зъізды, а тіж інчы елементы звязаны напр. в підземном інфраструктуром.

Ластівчата з нагородом!

Ансамбль Ластівчата здобыл ІІ місце підчас фестіалю Свято Любушского Воєвідства «Земля і пісня», котре прошло в пятницю 3. липця/юлия в Шпротаві. В конкурсі участ взяло 40 ансамблів, якы презентували ся в ріжных катеґориях. Ластівчата змагали ся в катеґориі дітячо-молодіжных ансамблів. Сердечні ґратулюєме!