Сумар дня на 8. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 8. листопада/новембра 2024 р.

Власти бесідували о актуальных проблемах малопольскых самоурядів

Як інформувало пресове Бюро Маршалківского Уряду Малопольского Воєвідства, в минулу середу 6. листопада/новембра Маршалок Лукаш Смулка стрітил ся з Зарядом Форум Війтів, Бургомайстрів і Президентів Малопольщы. Стріча была нагодом, жебы омовити пляны розвитку малопольскых єдиниц територияльного самоуряду в найблизшым часі. Підчас стрічы бесідувано м.ін. о актуальных проблемах малопольскых самоурядів і найбарже жданых інвестициях. Порушена была і тема дофінансуваня ключовых для ґмін і повітів проєктів з середків проґраму Европейскы Фонды для Малопольщы 2021-2027.

Реґєтівскы іконы вернули з консерваторской працовні

Одреставруваны іконы вернули до іконостасу православной церкви св. Архістратига Михала в Реґєтові. Інформувал о тым в минулым тыжни парох о. Ярослав Ґрич. Парохія отримала в тым році дотацию з Міністерства Культуры і Нацийональной Спадковины в высокости 55 тис. злотых на консерваторскы працы при реченых іконах. Іконы походят з першой половины ХХ столітя, были в барз злым стані, зато вымагали скорой консерваторской інтервенциі. То Іконы праздників, Тайной Вечері та Христа Пантократора – разом 14 ікон з реґєтівского іконостасу. Тепер, коли іконы вернули уж на своє місце, парохія мусит ся фінансово розрахувати. Власный вклад парохіі то 11 тис. злотых. Окрем того парохія мусит покрыти частичный кошт ремонту елевациі церкви в высокости 4 тис. злотых (ціліст вынесла 26 тис. злотых) – сут то непередвиджены выдаткы на малюваня святыні, якы сильно надшарпнули невеликій парохіяльный буджет. Реґєтівска спільнота є барз мала, зато вірны звертают ся до вшыткых, кому близкє є тото село і його церков, о поміч в зобраню потрібных грошів. Одкрыта є соспільна колекта на сайі zrzutka.pl пн. «Prace konserwatorskie przy ikonach oraz remont elewacji w cerkwi prawosławnej w Regietowie».

«Лемкы в Центрі» – подія в Любіні

В днях 15. і 16. листопада/новембра в Любіні одбуде ся подія з назвом «Лемкы в Центрі». Орґанізаторами сут Центр Творчых Діянь в Любіні, Любіньскій Повіт і Православна Парохія Святой Тройці в Любіні. Дводньовый проґрам одбуде ся в Центрі Творчых Діянь в Любіні, в пятницю і суботу од 17.00 год. Будут концерты, прелекциі, выстава, не бракне і деґустациі лемківской кухні. Другого дня акциі концерт даст Лемківскій Ансамбль Пісні і Танця «Ластівочка». Подія буде получена зо святкуваньом 100 річниці отриманя Польском Правнославном Церквом автокефалиі. З той нагоды буде мож выслухати прелекций звязаных з історийом православія в Польщы та одбуде ся вернісажы выставы пн. «Ікона в Центрі». Жебы взяти участ в подіі треба перше одобрати дармовы білеты, доступны в Секретарияті Ценрту Творчых Діянь в Любіні.

Паркова Гора зас буде найяснійшым місцьом Крениці

Заран на Парковій Горі в Креници рушыт зимова атракция – Парк Світла в стилю ретро. Єдночасно завершыт ся осінній технічный перегляд колейкы і од суботы на Паркову Гору буде мож зас віхати ориґінальном 87-літньом желізницьом. Ретро Парк Світла має перенести одвиджаючых в часі до 30. років ХХ столітя. Цілый зимовый сезон, до 3. марця будучого рока, парк буде розсвітлюваный штоденно од 15.00 год. На верху будут підсвітлены ретро-альтанка, фонтанна, ретро-автомобілі, а з патефону звучала буде давна музика.