Сумар дня на 8. мая 2025 р.

Приносиме вам сумар медияльной ґрупы ЛЕМ.фм+ на ден 8. мая 2025 р.

Єдиный матуриста з лемківского языка

Як сме уж вчера заявляи, в віторок была здавана дальшый раз матура з лемківского языка. Як раз на початок матуральных іспытів, якы зачали ся в понедільок. Tогорічным матуристом, якій написал матуру з лемківского в Ліґници, єст Михал Стариньскій, сын Юрия Стариньского, основателя і кєрівника Лемківского Ансамблю Пісні і Танця «Кычера», в котрым од наймолодшых років діял і тогорічный матуриста. Традицийні в аркушы матуры нашли ся дві темы. Перша з них тыкала представліня хыжы в літературі. Треба было порівнати способы єй описуваня на основі вершів Володислава Граба пн. «Предо мном» і Петра Мурянкы пн. «Вікно на світ». То тоту тему выбрал матуриста. Друга з тем односила ся до того, як на еміґрациі мож плекати тото, што рідне. Ту был поданый выімок з тексту нашой редакцийной камараткы Наталиі Малецкой-Новак пн. «Першый імпресаріо лемківской музикы». Треба было однести ся до реченого фраґменту, а додатково прикликати дакій другій текст з лемківской літературы.

Конкурс «Я і Никыфор»

Стоваришыня «Руска Бурса» в Ґорлицях просит до участи в плястичным конкурсі для діти під наголовком «Я i Никыфор». На нашым сайті в закладці Подіі найдете реґулямін конкурсу. Термін надсыланя прац є до 31. мая тр. Плястичны працы мают односити ся до творчости Епіфана Дровняка – Никыфора. Конкурс є презначеный для вшыткых учеників кляс основной школы і предшколяків. Єден автор може зголосити лем єдну працу. Формат то A4. Передвиджено атракцийны нагороды!

Школярі з Руского Керестура на Словациі

Одділіня про освіту Нацийонального Совіту Русинів в Сербіі зорґанізувало для 24 школярів осмой клясы Основной Школы Петро Кузмяк в Рускым Керестурі екскурсию на Словацию, котра одбыла ся в днях 1.-4. мая. Є она нагородом Нацийонального Совіту Русинів про школярів, же вісем років вчат ся по русиньскы, в рідным языку. Ученикы так мают можливіст видіти, одкаль пришли іх предкы. Школярі были закватеруваны в Требішові, але ходили так само до Землиньской Теплиці, бывшого Керестура. Зашли і до Кошыц, Пряшова ци вызначного поломницкого місця грекокатоликів – Лютины.

Поломничество любіньской парохіі до Арменіі

Православна парохія св. Тройці в Любіні орґанізує поломничество до Арменіі. Одбуде ся оно з благословліня владыкы Юрия, архієпископа вроцлавско-щеціньского. Заплянуване єст в днях од 21. до 31. мая тр. Кошт то 1400 евро і кошты білету на літак. Заінтересуваны можут контактувати ся з парохом любіньской церкви о. Богданом Репелом, або писати на майля cerkiew_lubin@op.pl. Ґрупа поломників буде чыслила 16 осіб.