Сумар дня на 8. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 8. жолтня/октобра 2021 р.

Конференция на тему інформуваня в языках нацийональных меншын в Сербіі

В середу, 6. жолтня/октобра, в Сербіі проходила онляйнова конференция на тему «Інформуваня в языках нацийональных меншын в світлі реализациі Медияльной Стратеґіі Сербской Республикы». Орґанізатором конфернециі было выдавництво «Рускє Слово» при підпорі Місиі Орґанізациі Безпекы і Спілпрацы в Европі в Сербскій Республиці, Незалежного Здружыня Новинарів Сербіі і Незалежного Дружства Новинарів Войводины. В конференциі брали участ м.ін. шеф ОБСЕ Ян Брату, державна секретарка Міністерства Прав Чловека і Меншын та Социяльного Діалоґу Олена Папуґа, окрема радкыня Міністерства Культуры і Інформуваня Ґордана Предіч, председа Нацийонального Совіту Русинів Борислав Сакач, як і дальшы представникы русиньской меншыны, нацийональных совітів і меншыновых медий.

Початок шкільного рока для лемківскых учеників

Заран в Мазярскій Загороді в Лоси одбуде ся початок шкільного рока для діти і молодежы зо шкіл ґорлицкого повіту, де вчат ся лемківского языка. Возмут в ним участ ученикы основных шкіл з ріжных сел і середніх шкіл в Ґорлицях та ґрупа предшколяків. Будут то школяре од учытельок: Варвары Дуць, Анны Рыдзанич, Орины Гутиряк і Монікы Тылявской. Ученикы будут мати нагоду взяти участ в спортовых конкурсах ци варштатах, на котрых будут м.ін. прінтувати полотняны мішкы. Одбуде ся і прелекция, в часі котрой молодіж буде могла послухати про мазярів. Орґанізатором подіі єст Руска Бурса в Ґорлицях. Руска Бурса од років доцінят посвячыня діти і молодежы, котры ся берут на додатковы занятя з лемківского языка. В тій ціли орґанізує для учеників такы подіі як прим. початок і закінчыня шкільного рока, перегляд колядничых ґруп ци выізд до Театру Александра Духновича в Пряшові.

Дорога нр 1513 К Поворозник – Тылич закрыта для руху

Повітовый Заряд Доріг в Новым Санчы інформує, же в наступный понедільок, 11. жолтня/октобра, будут ведены ремонтовы роботы, в рамках якых класти будут стеральну верхню верству на повітовій дорозі нр 1513 К Поворозник – Тылич. В звязку з тым, в реченый ден в год. од 7.00 до 18.00 дорога буде закрыта для руху на одтинку долгости ок. 2 км од крижівкы з воєвідском дорогом нр 971 в Поворознику до другого мосту. Обовязувал буде обізд воєвідском дорогом нр 971 та повітовом дорогом 1512 К Крениця – Тылич. Як подає Уряд Міста і Курортной Ґміны Мушына, дальшы одтинкы дорогы будут реализуваны од віторка 12. до четверга 14. жолтня/октобра. В тым часі вымінены одтинкы так само будут вылучены з руху. Реализация заплянуваных прац єст залежна од погодовых условій. Кєд конечна буде зміна терміну, інформация о тым явит ся на вебсайті Уряду.

Выдолжены записы на Лемковина Ультра Трейль

Іщы до наступного понеділька, 11. жолтня/октобра, мож ся записувати до участи в тогорічных осінніх бігах Лемковина Ультра Трейль. Як інформуют орґанізаторы, записы мали быти перше одкрыты лем до 1. жолтня/октобра, єднак беручы до увагы чысло осіб, якє ся записувало в послідніх днях, рішыли выдолжыти час записів до 11. жолтня/октобра. До выбору єст пят дистансів: 30, 48, 70, 100 і 150 км. Бігы выстартуют з Крениці, Гыровой, Пулав Выжніх і Івонича. Мета буде ся находила в Команчы. Бігы будут проходити в вікенд 23.-24. жолтня/октобра тр.