Сумар дня на 8. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 8. жолтня/октобра 2026 р.

Стоваришыня Лемків просит на подію до Ґожова

Стоваришыня Лемків просит 25. жолтня/октобра на ХХХІІ Стрічы з Лемківском Культуром в Ґожові Великопольскым. Стріча зачне ся о 16.00 год. в Театрі ім. Юлиюша Остервы, до котрого подія вертат по парурічній переві, колиси одбывала ся літньом пором в центрі міста. В рамках подіі выступлят Лемко Тавер Юньор, Карпатія, Дамир та Ансамбль Народного Танця «Малы Ґожовякы». Вступне на подію то 40 зл (мож придбати в касі театру). Подію орґанізує ґожівскій Кружок Стоваришыня Лемків.

Штораз меньше воды в Климківці

Климківскє штучне озеро штораз барже высыхат. Вода одступила од берегів, а на середині появляют ся фраґменты дна, котры припоминают уж малы островы. Низкій рівен воды є результатом долготыраючой посухы і недостатку опадів. Воды Польскы продолжуют роботы над зміном правил ґаздуваня водом в Климківці. 6. жолтня/октобра в Ґорлицях стрітили ся представникы державной інституциі Польскы Воды і місцевых самоурядів. Плянуванe є позысканя гыдролоґічно-гыдравличной експертизы, котра має вказати, ци можливе є утримувати в резервуарі высшый рівен воды, а єдночасно ци даст ся утримату достаточну кількість воды в Ропі для околичных жытелів. Самоуряды сподівают ся, што експертиза і зміна інструкций ґаздуваня водом допоможут ліпше забезпечыти водны ресурсы реґіону. На тот момент, як інформуют Польскы Воды, ніт загорозы перерв в доставах питной воды до ґміны Ґорлиці.

Порядкуваня цмонтерів з І світовой войны

В днях од 8. до 10. жолтня/октобра проходила буде XI Акция порядкуваня цмонтерів І Світовой Войны на обшыри Низкого Бескіду. До спільной акциі запрошены сут вшыткы охочы та вшыткы тоты, котрым близка є памят о покійных вояках. 10. жолтня/октобра о 17:00 год. в Ґосподі Маґурскій в Маластові одбуде ся підсумуваня той акциі. При нагоді будут презентуваны дві фотоґрафічны выставы: «Ґалицийскы цмонтері – погляд по 100 роках» Вальдемара Добровольского та «Діяльніст СКПБ Ряшів на воєнных цмонтерях» Томаша Прунала. Акция має медженародный характер – почестный патронат тримают Амбасадор Словацкой Республикы в Польщы, Комендант Головный Поліциі та Малопольскій і Підкарпатскій Воєводы, а тіж Консулі Німец, Мадяр і Австриі.

«Чом ты, хмаро, заздростиш»

Уж заран, в пятницю 9. жолтня/октобра о 17.00 год. в Інституті Нематерияльной Спадковины Карпатскых Народів в Людзьмєжы одбуде ся вернісаж выставы Давида Здобыляка пн. «Чом ты, хмаро, заздростиш». Підчас одкрытя выступит ансамбль Лада. Експозиция буде доступна в Людзьмєжы до 29. листопада/новембра того рока. Як інформувал артиста, Давид Здобыляк, барз ся му полюбил твір «В темну нічку», з якого походят як раз слова наголовка выставы. Автором слів «В темну нічку» є Семан Мадзелян, а музику опрацувал Маестро Ярослав Трохановскій. Пісня была розпропаґувана через Репрезентацийный Ансамбль Лемків в Польщы «Лемковина».