Сумар дня на 9. червця/юнія 2026 р.
Приносиме вам сумар медияльной ґрупы ЛЕМ.фм+ на ден 9. червця/юнія 2026 р.
XXXI Поломництво Нацийональных і Етнічных Меншын на Гору Святой Анны
7. червця/юнія одбыло ся XXXI Поломництво Нацийональных і Етнічных Меншын на Гору Святой Анны (опольске воєвідство). В подіi взяло участ близко тисяч осіб, головнi представникы німецкой меншыны, але тіж делеґациі Ромів та шлезскых орґанізаций. Центральным пунктом поломництва была Свята Літургія в Люрдскій Печерi, котру очелювал опольскiй єпископ Анджей Чая. Підчас целебрациi підкрисляно значыня языка, культуры і традициi для захованя достоменности нацийональных і етнічных меншын. Участникы звертали тіж увагу на потребу діалоґу, взаiмного порозумліня i будуваня добрых однeсiнь помедже поєдныма спільнотами. Орґанізаторы поломництва вказали на менше як в попередніх роках чысло участників. За представниками меншын, є то звязане м.ін. зо старіньом членів спільнот i зменшаньом ся iх чысленнности, зато являт ся потреба анґажуваня молодого поколіня в дiяльніст меншын. Протягом стрічы припомнено тіж близку річницю підписаня польско-німецкого трактату «О добрым сусідстві і приязнiй спілпрацы» з 17. червця/юнія 1991 р., котрый для німецкой меншыны в Польщы становит важный фундамент єй існуваня і дiяльности. Поломництво на Гору Святой Анны є орґанізуване од веце як тридцетьох років і єст єдном з найважнійшых подій, котры інтеґруют представників нацийональных і етнічных меншын на Шлеску.
Ден Русинiв Совациi в Меджелабірцях
Од 12. до 14. червця/юнія в Меджелабірцях Русины на Словациі будут празднувати своє свято і 35 років Світового Конґресу Русинів. Русиньска Оброда на Словациі во спiлпрацы зо Світовым Конґресом Русинів, Світовом Радом Русинів i містом Меджелабірці приготовлює святкуваня Дня Русинів Словациi, што буде получене з припомніньом вызначного ювілею – 35. рiчницьом основаня СКР. Як раз Меджелабірці сут місцьом, де в 1991 р. одбыл ся першый Світовый Конґрес Русинів. Святкуваня зачне ся 12. червця/юнія о год. 19:30 в просторах АРТ Готелю, де одбуде ся бесіда під назвом «Прямы участникы І Світового Конґресу Русинів в Меджелабірцях». Пак, в собуту од 9:00 год. плянуваны сут дальшы подii, м.iн.: конференция, процесия в кроях, ґаляпроґрам в амфітеатрі, показ фільму «Потопа» i стріча з творцями і акторами. Недільный проґрам завершыт святочне засіданья Світовой Рады Русинів і Божественна літургія. Орґанізаторы просят на подiю вшыткых Русинів, любителів русиньской культуры, фольклору, істориі і традиций.
Дрібниці находят ся на нашым портали.
Будучы подii в Бескiдi
В тот вiкенд 12.-14. червця/юнія одбудут ся XIII Гiрскы Змаганя Маластiвска Маґура. В звязку з тым в тых днях од год. 6:00 до 21:00 переiзд одтинком воєвідской дорогы 977 через Маґуру од Маластова по Ґладышiв буде запертый.
27. червця/юнія в Устю Рускым одбуде ся XV едиция «Малопольского Бескідского Клясика» – аматорскых роверовых змагань, орґанізуваных в Низкым Бескіді. Траса змагань мат около 53,6 км, і што є важне тіж для осіб, котры не берут участи – ціла траса буде заперта для руху авт. Старт і мета будут на стадийоні ЛКС Устя Ґорлицкє. В рамках подіi плянуваны сут додатковы атракциi такы як: родинны зоны, експозициi i концерты.
Більше інформаций найдете на сайті змагань.
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
