Сумар дня на 9. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 9. грудня/децембра 2021 р.

Любіньскій Ден Русинів

5. грудня/децембра святкуваня Дня Русинів Польщы проходили заєдно на нашій рідній Лемковині, але тіж на землях выгнаня. Спомнути фльориньскє віче зышли ся члены Кружка СЛ в Любіні. З той нагоды зрыхтували своі святкуваня. Не были то лем святкуваня повязаны зо споминами ци гостином. Любіньскє одділіня зрыхтувало специяльне звукове награня, якым поділили ся і з нашым радийом. Як інформує ведучый Кружка СЛ в Любіні Павел Стафиняк, в тот ден одбыло ся засіданя членів, якє было посвячене святкуваню Дня Русинів. На тым зобраню награли проґрам зо святкуваня з музичным підкладом і чытаньом вершв бл. п. Павла Стефановского. Награня было передане Стоваришыню «Руска Бурса» в Ґорлицях в ціли схоснуваня в радию ЛЕМ.фм. Не были то першы святкуваня нацийонального свята Лемків орґанізуваны любіньскым одділіньом. Влони Ден Русинів был упамятненый молитвом за бл. п. Богдана Ґамбаля.

Кінчыт ся ювілейный рік Мукачівской Єпархіі

Мукачівска Грекокатолицка Єпархія просит на святочны богослужыня з нагоды закрытя ювілейного рока. В 2021 р. тота русиньска церков споминала на 375. річницю Ужгородской Уніі, 250. річницю основаня Мукачівской Грекокатолицкой Єпархіі і 20. річницю од канонізациі владыкы Теодора Ромжы. Завершыня ювілейного рока має ся одбыти в неділю, 26. грудня/децембра. В тот ден о 16.00 год. буде служыти ся вечырня, а пак о 17.00 архієрейска Божеска Літругія в Соборі Успіня Пресвятой Богородиці в Мукачеві. Мукачівска Грекокатолицка Єпархія є найстаршом русиньском єпархійом, котра выникла по Ужгородскій Уніі. Свій центр має в Ужгороді.

Видокова вежа над Свидником пропонує нічліг

Нова видокова вежа над Свидником дає туристам і можливіст переночувати. Подля слів пріматоркы міста не є то клясична видокова вежа, кєд же єй в рамках находит ся і місце до спаня з панорамічным облаком. Каждый, хто одважыт ся переночувати в притулку, має ґарантуваный красный выгляд на місто Свидник. Пріматорка Іванчова припомянула, же по підписаню контракту з містом фірма, яка мала вежу выбудувати, стрітила ся з проблемом, котрым был недостаток дерева, головного такого, котре было напроєктуване на выбудуваня той новой туристичной атракциі. Ціна проєкту была 80 тис. евро, з чого 40 тис. дали спонсоры, 20 тис. дал Пряшівскій Самосправный Край, а дальшых 20 тис. евро заплатило місто.

КВІБ пропаґує історичны атракциі

Як інформувал Клюб Воєнной Істориі Бескіды, з підпором Пряшівского Самосправного Краю подарило ся му зреализувати вебсайт, котрый обсягує датабазу місц і дій повязаных з І світовом войном. Доднес в реґіоні пілнічно-східньой Словациі сохранило ся вельо воєнно-історичных памяток. Найвеце знаныма сут воєнны цмонтері, сохранили ся і ріжны памятникы, історичны будинкы або обєкты, котры сут повязаны з даным періодом. Новый сайт, котрый є під адресом www.ww1.sk, обсягує основны інформациі о тых місцях, як і мапу. Заінтересувана особа може допереду зробити плян свого путуваня по памятках. Клюб підкрислил, же даны в датабазі ся дополнюют о дальшы інтересуючы місця, як і о новы фотоґрафіі ци інформациі. Сайт є по словацкы і анґлицкы.