Сумар дня на 9. марця 2021 р.

Приносиме вам сумар медияльной ґрупы ЛЕМ.фм+ на ден 9. марця 2021 р.

З Санковой до Вапенного на ровері або піше

В ґміні Санкова медже будинком ґміны а курортом в Вапенным, вздолж повітовой дорогы, возникне нова пішо-роверова стежка. Будова той інвестициі зачала ся осіню 2020 рока в рамках партнерского проєкту «Розбудова систему еколоґічного транспорту способом на зменшыня занечыщыня повітря і і высшый комфорт подорожуваня в функцийональній обшыри міста Ґорлиці». Початково траса мала мати 3,7 км, але в остатнім часі рішено выдолжыти ю о дальшых 300 метрів. Стежка возникне в формі Bike and Ride, што значыт, же на трасі найдут ся штырі пристанкы, де мож буде лишыти ровер і перенести ся до автобусовой комунікациі. Пляново стежка буде оддана до хоснуваня в половині того рока.

Што дале з будовом новой сідибы сандецкого одділіня Державного Архіву?

Початком рока інформували сме, же неодолга зачне ся будова новой сідибы сандецкого одділіня Державного Архіву в Кракові. Як ся вказало, з фінансовых причын будова інвестициі може ся опізнити – дальше не выбрано выконавці. В оголошеным недавно конкурсі, свою оферту зголосила лем єдна спілка, пропозиция котрой єст більша як квота забезпечена на реализацию проєкту о сім мілийонів. З той причыны Державный Архів в Кракові звернул ся до міністра Культуры і Нацийональной Спадковины збільшыти пулю грошів презначеных на будову сідибы сандецкого архіву. В разі неґативной одповіди конкурс буде повтореный з надійом отримати оферты з низшыма цінами, котры змістят ся в рамках дофінансуваня.

Поважный выпадок медже Чырном а Мохначком

В неділю, 7. марця, в ґміні Крениця медже Чырном а Выжньом Мохначком дошло до дорогового выпадку з участю ратункового авта. Амбулянс, якій наштоден має дижур в Устю Рускым, в часі повороту з ратунковой акциі, з незнаных на тот момент причын, на острым закруті вылетіл з дорогы і вдарил в дерево. В середині не было жадного пациєнта. Пошкодуваных было двох медиків. Єден в тяжкым стані был транспортуваный гелікоптером до краківского шпыталя, другій з меншыма фізичныма травмами был забраный автом скорой допомогы.

Упамятніня жыдівской родины в Старій Любовни

В пятницю, 5. марця, на пляци св. Николая в Старій Любовни в рамках проєкту Stolpersteine осаджено два камінны кубы, котры сут посвячены жыдівскій родині Бляєровых. Проєкт реализуваный єст в многых европейскых містах. Як повіл директор Областной Орґанізациі Туристичного Руху Северный Спіш – Пєнины, Якуб Ондрей, люде знают барз мало о жытю і траґічных істориях Жыдів з іх реґіону. Маючы тото на увазі, здружыня UM UM при вспілпрацы зо словацком орґанізацийом Antikomplex і німецкыма партнерами рішыли реализувати німецкій проєкт Stolpersteine. Концепция проєкту то осадити невеликы золоты або бронзовы камінны кубы невелькых вымірів в місцях, де прожывали жертвы голокаусту. Цілю проєкту єст не лем підтримувати памят і спадковину Жыдів, але тіж протидіяти ксенофобіі і расовій ненависти. Родина Бляєровых, упамятнена в Старій Любовни, в меджевоєнным періоді была властительом друкарні і Провінчного Дому, в котрым актуально находит ся містецка ґалерия. Памятны кубы посвячены сут конкретно Анні Бляєровій і єй сынови Елемерови Бляєрови, котры вмерли в концентрацийным лаґрі. Камінны памятникы были осаджены на місци, де прожывали упамятнены.