Сумар дня на 9. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 9. жолтня/октобра 2024 р.

Вмер проф. др габ. Юзеф Пулцвяртек

На 89 році вмер проф. др габ. Юзеф Пулцвяртек (Półćwiartek), історик, реґіоналиста, педаґоґ, працівник Ряшівского Університету. Был автором чысленных історичных робіт, книжок, розмаітых науковых, популярнонауковых ци реґіональных публикаций і дописів. Писал м.ін. о лаґрі в Явожні, господарці грекокатолицкых парохій на Лемковині, о односинах медже латиньскым Костелом а грекокатолицком і православном Церквом, о односинах на польско-рускым пограничы. Был і членом Польской Академіі Наук в Кракові і Медженародной Історичной Польско-Украіньской Комісиі при Комітеті Історичных Наук Польской Академіі Наук. За дидактичну і наукову діяльніст был одзначеный м.ін. Кавалерскым Крестом Ордеру Одроджыня Польщы і Золотым Крестом Заслугы. Был почестным громадянином Лежайска. В Музею Лежайской Землі находит ся обшырна бібліотека посвячена істориі полудньово-східньой Польщы дарувана проф. Пулцвяртеком.

Вечер посвяченый Гарасимовичови, не бракне лемківского голосу

В найблизшу суботу 12. жолтня/октобра в рамках Ночы Поезиі в Кракові одбуде ся вечер посвяченый поеті Єжы Гарасимовичови. Специяльным гостьом буде Алян Вайс, автор книжкы «Так як місяц. Поетицкє жытя Єжы Гарасимовича», што была інспірацийом стрічы. Другым специяльным гостьом мал быти лемківскій поета Петро Мурянка, але з огляду на проходячы в Креници русиньскы подіі, не буде присутный, буде зас в цілости одчытаный текст надосланый Мурянком – спомин про Гарасимовича. Стріча зачне ся о 19.30 в Театрі Стиґматор в Клюбі Казімєж.

Ци памят має форму?

В рамках тогорічной Лемківской Творчой Осени, другого дня подіі, котрый проходит в Рускій Бурсі в Ґорлицях, одбуде ся вернісаж фотоґрафічной выставы «Материя памяти». Двоіх артистів фотоґрафікы, Ядвіґа Яновска та Хрістофер Мысько, прібуют одповісти на звіданя: ци даст ся затримати штоси, што минуло, як вказати тото, што невидиме, але дає ся одчути, і як вказати давне жытя, коли формальной його верствы неє. Два рокы реченый артистичный дует працувал в долині села Незнайова. Іх выстава порушат тему достоменности, памяти і істориі. Артисты замірили ся зробити коляж памяти, котра минула, хоц привидні єст присутна в історичных записах, списаных фактах і, як подают: «факты сут єднак сухы, не трафляют до головы так, як образ». Вернісаж одбуде ся в неділю 13. жолтня/октобра о 18.00 год.

Памят Чудотворной Клокочівской Іконы Пресвятой Богородиці

В неділю 6. жолтня/октобра грекокатолицка Церков на Словациі святкувала Памят Чудотворной Клокочівской Іконы Пресвятой Богородиці, Покровителькы Земплина. Торжественну архієрейску літургію одслужыл кыр Теодор Мацапула, мукачівскій єпарха, вєдно з архієпископом Кірилом Васильом – кошыцкым єпархом, владыком Міляном Хаутуром – емеритуваным кошыцкым єпархом, і духовенством. Проповід выголосил владыка Теодор. Вчас архієрейской літургіі співал катедральный хор з Ужгорода. Праздник Покровителькы Земплина был установленый Декретом Конґреґациі про Східні Церкви выданым в Ватикані в грудни/децембрі 2020 рока. Стало ся так на основі жадости товдышнього пряшівского архієпископа і митрополиты Йоана Бабяка і Рады Єрархів Пряшівской Митрополиі при нагоді 350. річниці слезіня Клокочівской Іконы. В вересни/септембрі 2021 рока в Пряшові папа римскый Франциск особисто торжественно ікону коронувал.