Свято Меду і Вина в Пшемкові то уж марка сама в собі. Того рока пройде XXII едиция подіі

Уж о пару днів, в вікенд 24. і 25. вересня/септембра, до Пшемкова зъіхают выставці меду з цілой Польщы. Тото популярне свято пчолярів пройде уж 22. раз.

Список выставців є каждого рока подібный і чыслит коло 120 стоіск. Дакотры то постійны бывальці – продуценты меду, што рік в рік приізджают зо своім медом, а купуют в них стары і новы кієнты. Свято Меду і Вина притігат до Пшемкова тисячы осіб, бо то як дотепер єдина того рода подія в Европі.

Веце і веце пчолячых родин

Вальдемар Кудла, презес Союзу Пчолярів Ліґницкой Землі подає, што тогорічне свято буде інче. «Люде не купуют уж тілько меду, што колиси, не роблят запасів, бо то не перша потреба. Рахуют каждый ґрош, а як купуют, то лем слоік або два, выберают тоты меншы. Ціна меду не єст низка, бо того рока єст го менше, а кошты продукциі ся звекшыли» – бесідує Кудла.

Середньо за літорвый слоік треба заплатити найменше 50 зл, а тот, што тішыт ся найвекшым заінтересуваньом, мед з вересу, коштує аж і 80 зл за слоік.

Членами Союзу Пчолярів Ліґницкой Землі є близко 800 осіб, з рока на рік є іх веце. Веце є тіж пчолячых родин. Найчысленнійшым реґіоном є ґлоґівскій кружок. «Тото тішыт, бо видно, што заінтересуваня роботом в пасіці не устає, тіж серед молодшых. Треба найменше двох, трьох років, жебы мати даякій хосен, а на жаль, не каждый є в силі ждати. Пчоляр мусит быти барз терпеливый» – зазначат презез СПЛЗ Кудла.

Ластівочка амбасадором лемківской культуры на пшемківскій сцені

Пшемківскє свято, окрем медів і вина, то тіж богатый в атракциі проґрам. На естраді в містным парку запрезентує ся м.ін. ансамбль Ластівочка. На стоісках буде мож купити розмаіты продукты.

Традицийом є, што в другій ден проходит екуменічне богослужыня при участи парохів вшыткых місцевых конфесий, в єдным з пшемківскых храмів. Того рока літругію будут правити в православній церкви покровы св. Михала Архангела.

Вчас Свята Меду в проґрамі сут і конкурсы для пропаґуваня знаня о меді і його продуктах, вручаны будут і медалі за «Взірцьову Пасіку» та «Взірцьову Пасічну Ґаздівку» Нижнього Шлезка, окремо за самы меды: вересовый, вельоквітовый, ріпаковый, акацийовый, липовый, гречаный, златицьовый ци падевый.

Нижньошлезскє Свято Меду і Вина в Пшемкові было в 2008 р. обняте охороном Патентового Уряду Польской Республикы.