Табір православной молодежы з чужыны на Лемковині

В днях 15.-20. липця/юлия 2018 р. православна молодіж любіньского деканату вроцлавско-щеціньской єпархіі брала участ в таборі на Лемковині, інформувал о тым єпархіяльний інтернетовий сайт. Тых пару дни на земли предків дало можніст ліпше познати Лемковину і причынило ся до упорядкуваня двох лемківскых цмонтери.

Табір проходил з благословіня ординария єпархіі, Архієпископа Юрия. Орґанізатором і ґаздом подіі был Осередок Православной Культуры Елпіс в Ґорлицях, діючий в рамках перемышльско-ґорлицкой єпархіі. Молодіж стрітила ся з місцевым владыком, Архієпископом Паісийом.

Табір збогачений был о практичны діяня в обшыри сохранія сепулькральной спадковины Лемковины. Участникы вели порядковы і інвентаризацийны роботы на цмонтерях в Ізбах і Баници. В першым з сел в 2012 р. был на новым цмонтери святочно одкрытий пропамятний крест в памят спочываючых там предків і выгнаных в наслідстві акциі Вісла. Влони на старым ізбяньскым теметові, хоснуваным до 1928 р., был поставлений другій пропамятний камін. В плянах Орґанізацийного Комітету з Ліґниці є його офіцийне посвячыня.

Молодіж путувала не лем по Лемковині. Участникы найперше звиділи Музей Лемківской Культуры в Зындрановій, а пак Скансен в Бардиівскых Купелях на Пряшівщыні. Путували шляком православных храмів, были в церквах в Ганчовій, Білянці, Ґорлицях ай Бардийові. В кафедральным храмі св. Тройці в Ґорлицях брали участ в акафисті до священномученика Максима Ґорлицкого.

Опікунами были о. Любомир Воргач, парох церкви Воскресіня Христового в Ліґници, та о. Славомир Сороканич з парохіі свв. Космы і Даміана в Студзьонках. Провідником на місци был о. Роман Дубец, настоятель ґорлицкого храму і ведучий осередка Елпіс. Табір причынил ся до пошыріня знаня про історию і культуру Лемковины та хоснуваня лемківского языка серед молодежы.

В склад любіньского деканату вроцлавско-щеціньской єпархіі входит девят парохій і єдна каплиця. Прихожанами реченых храмів сут предовшыткым потомны выселеных в 1947 р. з Лемковины. Найстаршы парохіі в деканаті ериґуваны были внет по переселінях. Єдном з них была ліґницка парохія Воскресіня Христового, котра ярю текучого рока упамятнила свою 70. річницю.

фот. о. Любомир Воргач