ТАД одпремєрує пєсу Іванов од Чехова

В пятніцю 17-го марца 2023-го року Театер Александра Духновіча в Пряшові на своїй Великій сцені одпремєрує пєсу Іванов од Антона Павловіча Чехова. Режісером новой пєсы в репертоарі русиньского театру є Светозар Спрушаньскый.

Як приближує дію пєсы театер, головный герой інсценації не розуміє самого себе. Колись давно быв повный жывота і енерґії. Общественно анаґажовав ся, ініціатівно мінив діла ку ліпшому.

„Актівно глядав путь до людей, до ліпшых завтрашніх днів. Днесь го нич не інтересує. Ани властне жытя, ани тоты остатні, ани довгы, котры наробив, і котры затяжують його маєток. Колись любив свою жену, котру їй родина з причіны його віры одшмарила і выдідила. Але днесь єй вже не любить. Не докаже єй любити. Хоць знать, же штохвіля вмре,“ приближує театер.

Як далше інформують творцьове новой пєсы, Іванов є отровленый безнадійныма обставинами в сполочностии. Вшыткыма, котры суть коло нього. Топить ся в безцільовости, безнадії, всядыль присутній нуді.

„Стратив будьяку енерґію, дяку жыти. Його душевна пустота оддзеркалює общый холод, аґресівность, поверьхность, незначность і безоглядность навколишнього світа. Но він чує потребу прінціпіалной зміны. Але не докаже єй зреалізовати.“

Головну роль Николая Алексеєвіча Іванова грать Євеґній Либезнюк, його жену Сару – Анну Петровну, Владиміра Штефанікова і Ярослава Сисакова. Сцена, костімы і выбер музикы суть під тактовков режісера Спрушаньского.

Перша „велика“ пєса Чехова з назвов Іванов мала премєру у 1887-ім році. Но їй характеры доднесь зособнюють вшыткы людьскы односины, тугы, сны, слабости, страхы, міцны сторінкы і неуспіхы. А іщі і жывше як колись.

Автор їх „рисує“ невіроятно продумано і правдиво. Значіть – траґікомічно. Зато суть нам і днесь такы близкы. Чехов своїм тіпічно лаконічным способом додавать: „Жаден роман, ани театрална пєса не докаже перевышыти наш досправдовый жывот в його абсурдности.“

Перед пятніцьовов премєров, яка має звычайный початок о 19.00 год., одбуде ся о пів семой і одкрытя выставы вызначного фотоґрафа і подникателя Ярослава Шуркалы під назвов Чаро театралной фотоґрафії. Выстава, котру театер орґанізує вєдно із СНМ – Музейом русиньской културы в Пряшові, пак буде в просторах театру приступна до 31-го мая.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА