ТАК для охороны природы в Карпатах

Загальнопольскє Товариство Охороны Птахів просит підписувати петицию для новых обшыри охороны природы в полудньово-східній Польщы. Іде головні о терены найстаршых капратскых лісів, долин потоків і жытлиск рідкых звірят і рослин. Бракує іщы коло 1700 підписів- то невельо, бо зобрали уж веце як 8300 голосів під своім апельом.

«Сут такы місця в Польщы, о котрых од давна відомо, што сут барз природничо цінны, мимо то не сут одповідньо хоронены» – подає Загальнопольскє Товариство Охороны Птахів, орґанізатор петициі. «Залежыт нам, жебы зробити гын резерваты природы, што будут хоронити найстаршы, ріжнорідны карпатскы лісы, долины потоків, жытлиска рідкых звірят і рослин. Зато урухомили сме петицию до Реґіонального Директора Охороны Середовиска в Ряшові, жебы обнял охороном найціннійшы місця в Підкарпатскым – в Бєщадах, Низкым Бескіді і на погірях» – чытаме дале.

Єдины такы місця прожываня для вельох ґатунків

Лісы підкарпатского воєвідства, особливо тоты, што злокализуваны в пасмі Карпат, то природнича перлина, не лем в скали Польщы, але тіж Европы. Гірскы пасма Бєщадів, Низкого Бескіду, Солонных Гір ци Перемышльского Погіря фурт скрывают добрі захованы, обшырны фраґменты Карпатской Пущы. «То гев в вельох місцях лісы заховали натуральный характер, а в іх гущавинах жыют вшыткы великы драпіжникы, якы іщы фурт мож стірити в Середущій Европі – медвід, волк, рысь і жбік» – подає природнича соспільна орґанізация. «Старолісы Підкарпатя то тіж місце жытя вельох інчых вынятковых ґатунків – тых добрі знаных, як жубр, ескуляпів гад, крикун передній, але і тисячів інчых» – подают. Што треба підкрислити – для вельох ґатунків то єдине місце выступуваня в Польщы. В оціні орґанізациі лісы Карпат в підкарпатскым воєвідстді не сут достаточно хоронены.

«Звекшат ся тиск на підкарпатскы лісы – в векшости надлісництв в подлісдніх роках обсервуєме збільшене позыскуваня дерева і збільшаня долгости лісовых доріг. Фраґменты лісів о натуральным характері, котры давнійше не были доступны, тепер (…) сут вытинаны. Лем коло 7 проц. лісів в тым реґіоні єст хороненых в резерватах і нацийональных парках. Єдночасно протягом послідньой декады не звекшыли обшыри ниякого з місцевых нацийональных парків, а основали лем єден резерват природы» – алярмує орґанізация.

Стоп для вытинкы, ТАК для охороны

Розвязаньом є подля Загальнопольского Товариства Охороны Птахів пасивна охорона – одповідньо великы фраґменты заросненых теренів лишат ся без господарчого хоснуваня. В стислі хороненых обшырях сут захованы натуральны процесы, котры в такых условіях можут ся тіж одтворити, звекшат ся чысло велькорозміровых дерев, а тіж мертвых дерев і тых, што замерают. Вертают ґатункы, котры ховают ся перед людми і што сут залежны од высоко натуральных лісів. «То тунє і барз ефективне розвязаня» – подає орґанізация.

«Знаме, де сут улокуваны найціннійшы фраґменты Карпатской Пущы, котры треба хоронити» – ґарантуют. Пропозициі такых обшыри, з природничом документацийом парократні складали (тіж Фундация Природнича Спадковина) до Реґіональной Дирекциі Охороны Середовиска в Ряшові. Разом зідентифікували коло 40 такых обшыри, о просторі парунадцетьох тисячів гектарів.

«Карпатскы лісы потрібуют охороны» – апелюют природникы.

Жебы підписати ся під петицийом – старчыт ввойти гев і переслати підпис. «Твій голос тіж ся рахує! Вкаж, же Тобі тіж залежыт на захованю карпатской природы!».