Талaнтливы Лемкы – выгрaли «Мам Талaнт»!

Гварят, же успіх приходит малыма крочками, але коли рік по рік пряче ся выграну інчым сперед носа, то уж не єст тіпцяня в місци, лем должезны скокы! 9. лютого/фебруара т.р. в І Загальноосвітным Ліцею ім. М. Кромера в Ґорлицях проходил меджешкільний конкурс «Мам Талант». Подля стереотипу, же коли зыйде ся двоє Лемків, то уж єст хор – так, по правді, было! Лемківско-польскє тріо ліцеалистів, в складі: Югаска Циран (3 кл. І ЗЛ), Марися Дубец (2 кл. І ЗЛ) і Фома Дошна (3 кл. І ЗЛ), при міцній конкуренциі, побідили другых выконавців.

Конкурс поділений был на катеґориі: музычны ґрупы, солисты і танец. Нашы выграны побідили інчых, выступуючых в найбарже популярній катеґориі – ансамблів. Хоц іх ансамбль был маленькій, зробил найбільше вражыня на жырі, котре оцінювало молодых артистів в складі: Ян Дрождж (директор І ЗЛ в Ґорлицях), Генрик Ромпала (директор Музычной Школы в Ґорлицях), Моніка Вацек (інструкторка танця з МДК) та дві учытелькы з І ЗЛ – Катажына Забєровска-Новак і Галина Малецка.

Хотіли сме заспівати лем «Під облачком», в версиі Ігоря Гербута, але пак Фома додал, же «Не пий Ваню» тіж єст файне, то може заміниме, Асі припомнуло ся «Ой, верше мій, верше», a мі ся барз любит «Ой, летіли гусонькы» – і вкінци не могли сме вырішыти (ах тот пребогатий лемківскій репертуар :)). Хотіли сме іх получыти – дає реляцию Марися Дубец.

Але за то як получыли! Не высилене, легкє і деликатне співаня дівчат, приємна гармонізация на три голоси справили, же лемківска вязанка очарувала не лем жырі, котре як уж знаме, признало ім перше місце, але і інтернетову соспільніст. Фільм з выступом уж ходит по сіти і зберат великє чысло ляйків.

Тогорічний выступ был спонтанным – бесідує дале Марися – самы сме ся зрыхтували і згармонізували тіж самы, на ухо, жебы добрі звучало. Молоды музыкы (вшыткы по музычных школах, М. Дубец кінчыт того рока школу ІІ ступеня) подумали сой на пару дни перед конкурсом, же возмут участ, але певно дакус помогла ім свідоміт, же влони, в кусіцька інчым складі (окрем Марисі і Фомы, співали з нима іщы Юстина Хомяк і Клавдия Ракочы), бравурово выграли «Конкурс Співанкы», орґанізуваний в іхнім ліцею (більше о тым найдете гев). Стрітили ся лем двараз, а же здібны – то старчыло, жебы выграти. Ґратулюєме і желаме дальшых успіхів, не лем музычных, бо матура уж што раз ближе, пак студиі і доросле жытя…

А для тых, што не заходят в фейсбуковы просторы, де мож найти концерт нашых співаків, пониже представляме выступ артистів, змонтуваний з присланого нам материялу (автором награня єст Макс Шымчак), за котрий сердечні дякуєме.