Голосник

Театральні серед Русинів Войводины

Од четверга до неділі, 15.-18. жолтня/октобра, тырвала буде в Рускым Керестурі в Войводині 52. едиция Драматичного Мемориялу «Петра Різнича Дяді». З огляду на епідемічну ситуацию одбуде ся в зміненій формі, але завдякы тому Русины по цілым світі будут мочы видіти пєсы.

В рамках фестівалю, котрый орґанізуваный єст войводиньскыма Русинами каждого рока, проведены будут три відеоконференциі з показами скорше представляных спектаклів Руского Народного Театру «Петра Різнича Дяді». Буде тіж єдна премєра продукциі Драматичного Студия Арт Дому Культуры з Руского Керестра.

Каждого дня о 19.00 год. на сцені Дому Культуры презентуваны будут фестівальовы спектаклі. Першым буде пєса Едґара Вальца «Кінґ-конґ» в режысериі Цвєтана Аничыча. Другого вечера вкажут «Місце стріч» Душана Ковачевича в режысериі Владимира Надя Ачыма, а на третій ден запрезентуют «Нацийональну стратеґію», котрой автором і режысером є Славко Орос. Мемориял закінченый буде премєром монодрамы «Сон смішного чловека» авторства Фіодора М. Достоєвского, котру вырежысерувал Владимир Надь Ачым, а одограл Мирослав Мамацко.

Петро Різнич Дядя, котрому присвяченый є мемориял, был актором, режысером, педаґоґом і культурно-освітным діячом серед бачваньскых Русинів. Орґанізувал драматичны кружкы, робил театральны пєсы. В 1933 році основал в Вербасі театр Руска Драма, а по другій світовій войні, коли перенюс ся до Руского Керестура, основал гын драматичный і фольклорый ансамбль. В 1948 році основал першый, аматорскій театр, а о два рокы пізнійше і театр ляльок.

Для утриманя одповідньой безпекы в фестівали може взяти участ макс. 130 осіб. Перед входом буде провіряна температура, обовязувати будут маскы, дезинфекция рук, заінсталюваны будут барєры до дезинфкециі черевіків.

За: ruskeslovo.com

Фот. Петро Різнич Дядя вєдно з акторами спектаклю «Ожалосцена фамелия» Б. Нушыча. За: Фб-фанпейдж ПРД

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі