«Театрум Юрия Новосільского»

В четвер, 18. листопада/новембра тр., в Державній Ґалериі Штукы в Сопоті пройде одкрытя выставы пн. «Театрум Юрия Новосільского». Експозиция єст пробом нового пізріня на творчіст клясикя ХХ ст., якым был Новосільскій. Тым разом выстава буде ся зосереджала на звязках артисты з шыроко понятым театром.

Новосільскій вказаный буде з єдной страны як сценоґраф, проєктуючый декорациі до театрів ляльок, а з другой як маляр, якого власный театр грат на образах.

На выставі запрезентувана буде м.ін. реконструкция видовиска «Кресиво» Ганны Янушевской, яка створена была подля байкы Ганса Християна Андерсена для Театру Ляльок «Пінокіо» в Лодзи, на потребы експозициі «Юрий Новосільскій. Театр ляльок. Запискы – част пята» в Ґалериі Стармах в 2015 р.

Першыраз буде мож тіж зазріти до працовні Юрия Новосільского, што ся находила колиси в його хыжы при ул. Нажымского в Кракові. Буде в ній мож обзерати малюваны артистом меблі, предметы, як і образы.

Експозиция, зааранжувана в єдній части як великій коляж, буде нагодом наново видіти вельо полотен, котры артиста намалювал медже 1954 і 1996 роком.

Юрий Новосільскій, коментуючы свою штуку, о театрі повіл: «Не мам ідеалу театру. Театр є жывым досвідчыньом чловека. Мож ся на тото одважыти, а мож од того втечы. Натоміст теоретичне спекулюваня о тым є просто безсильне, жебы не речы, што не на місци.

Знам лем єдно, што в моій свідомости театр, подібні як малярство і музика, приналежыт в пережываню до сферы сакрум. А кєд так є, то для ня театр на єдным кінци є цирком, на другым – богослужыньом. При чым, як чловек праві обсесийні занимаючый ся літургічныма квестиями, уважам християньску літургію і як трансформацию античного театру, і як форму цирку. Бо прецін літургія то рід святого цирку».

Выставі товаришыт каталоґ «Театрум Юрия Новосільского» запроєктуваный Рышардом Бєнертом. В публикациі, в альбомовій части помістили обшырный фотоґрафічный материял вшыткых робіт вказуваных на выставі та архівальны фотоґрафіі.

Вшыткы експонаты походят з колекциі Тересы і Анджея Стармахів. Выстава буде одкрыта до 20. лютого/фебруара 2022 рока.