Teo Думскій тым разом в Варшаві

Тоту історию знаме вшыткы – такы слова чытаме в тексті, опубликуваным на портали лем.фм близко два місяці тому. То заповід премєры аванґардового спектаклю «Короткій зарис вшыткого», в режысериі Тео Думского. Істо, знаме тоту історию вшыткы, але по премєрі, част з нас познала і саму модерну пєсу і самого, таємничого Тео Думского. Премєра одбыла ся 4. лютого/фебруара т.р. во вроцлавскым Кіні Новы Горизонты. Тепер являт ся нагода видіти тот же спектакль неодолга в столици Польщы.

Тео Думского з «Короткым зарисом вшыткого» буде мож обізріти 12. червця/юнія т.р., в Варшаві, в Кіні Прага (19.00 год., саля но. 2). На премєровым показі такой ціла саля вроцлавского кіна была выполнена, зато тым більше треба спішыти купувати білеты. Мож іх придбати в будинку кіна (ул. Ягайлоньска 26).

Хоц в першій інформациі о варшавскій премєрі «Короткого зарису вшыткого» была подана дата 26. квітня/апріля т.р. і такій термін передали сме в посліднім чыслі тыжденника ЛЕМ.фм+, орґанізаторы спектаклю перенесли вчера (21.04) час спектаклю в варшавскым Кіні Прага на червец/юній. Коли уж помалы буде приближала ся дата премєры, будеме Вам о тым іщы припоминати.

Аванґардовий спектакль, котрий лучыт присутніст жывого актора з кінематоґрафічныма техніками, дополненыма твореном на очах обзераючых рисункову сценоґрафію. Істория Світа оповіджена без хоснуваня слів.

Детальний опис цілого проєкту та головной ідеі, яка присвічала творці – чытайте на нашым портали в статях в лемківскым та польскым языках.

Тео Думскій, власт. Владимір Хомяк (нар. 4 мая 1984 р. во Вроцлаві) – режысер спектаклю, актор, драматурґ, абсольвент Державной Высшой Театральной Школы ім. Л. Сольского во Вроцлаві. То незалежний артиста, котрий, окрем сценічной діяльности, занимат ся досліджуваньом і вчыньом акторскых технік на фоні психолоґічных та духовых наук. Автор вельох формальных експериментів, предовшыткым в обшыри креативного хоснуваня новых технолоґій в театрі. Короткій зарис вшыткого – то найновше представліня Тео Думского і при тым подія, котра інавґурує проєкт Cloud Theater (Театр в хмарі). Автор звязаний з середовиском Стоваришыня Лемків. В студентскых часах был конферансиєром на Лемківскых Ватрах в Михалові. Там же одбыла ся премєра єдного з його короткометражовых фільмів, пн. Был єм гев, котрий вказувал артистичну візию гляданя достоменности молодым чловеком, котрий дознає ся, же єст Лемком.