Кєд бы дахто не знал, або призабил – ПРИПОМИНАМЕ! Днес, т.є. в суботу 18. червця/юнія 2016 р., просиме вшыткых на святкуваня 25-літя реактивациі Руской Бурсы і 5-літя ПЕРШОГО інтернетового НАШОГО радия. Хоц то лем принагідна східніст дат, тым більше нас она тішыт, же получыла ден 1. червця/юнія з 1991 рока, коли одбыло ся основательне зобраня покликаного наново Стоваришыня Руска Бурса в Ґорлицях, з тым самым дньом, лем о двадцет років потім, коли під стріхом бурсы в 2001 році зачало высылати радийо ЛЕМ.ФМ.
З той нагоды орґанізуєме пікнік, зато придте ґу нам, жебы поділити тоту радіст. Придте цілыма родинами, понеже зачнеме од забав з дітми. Не лем зато, же недавано мали своє свято (і оно проходит 1. червця/юнія!), але і зато, же неодолга скінчат шкільний рік. Буде то нагода подякувати ім за іх працу і труд, котры вложыли і на обовязковых занятях, і на лекциях з лемківского языка.
Буде тіж концертова част, котру орґанізуют позераючы на нас зо стіны выдатны Русины. Наш учытель Іван Русенко рішыл запросити на днешню подію бурсяну Терочку і Сусанну, а Александер Духнович попросил Марию Мачошкову, жебы прикрасили нашы ювілеі своіма выступами.
Початок од 14.00 год. на пляци перед Руском Бурсом при ул. Сєнкєвича 28 в Ґорлицях. Не старайте ся, же буде дощ – кєд бы уж так было, місця в Рускій Бурсі дост. А другє – по злій хвили, добра приде. 🙂 Красні просиме!
Коментарі