Торжественне засіданя Спільной Комісиі Уряду та Нацийональных і Етнічных Меншын

22. вересня (септембра) 2015 р. в сали ім. Тадеуша Мазовєцкого, котра находит ся в Канцеляриі Презеса Рады Міністрів Польской Республикы, проходило святочне засіданя Спільной Комісиі Уряду та Нацийональных Меншын на памят подіі сперед 10 років, коли, як наслідтсво записів Уставы о нацийональных і етнічных меншынах та о реґіональным языку, перший раз засідала речена Комісия (21. вересня 2005 р.).

Подію отворил начальник Департаменту Нацийональных і Етнічных Меншын МАіЦ – Добєслав Жемєнєвскій, а начальным єй пунктом было вручыня міністром Станіславом Гусковскым державных одзначынь. Першыма выкликаныма до врычуня нагороды были Романа Оброцка і Ярослав Трохановскій, котрых міністер одзначыл Золотым Крестом Заслугы. Міністер Гусковскій выкликал іщы Романа Хойнацкого і Ельжбєту Томчук, котрым вручыл Срібны Кресты Заслугы, а Бронзовы Кресты Заслугы Янови Адамовичови і Юзефови Адамови Дубиньскому. Вшыткы одзначыня были признаны Президентом Польской Республикы Анджейом Дудом за охорону і розвиток культуровой достоменности нацийональных і етнічных меншын.

Окрем того, вшыткы бывшы і теперішні члены Спільной Комісиі Уряду та Нацийональных Меншын одобрали признаны міністром Анджейом Галіцкым почестны грамоты за вклад в діяльніст Комісиі, посеред котрых нашли ся др габ. Олена Дуць-Файфер (репрезентуюча лемківску етнічну меншыну в 2005-2014 рр.) та актуальны члены – др Мирослава Копыстяньска і проф. Штефан Дудра (неприсутний в тым дни).

Торжественна стріча мала одбыти ся з участю Премєр ПР – Евы Копач, Міністра Адміністрациі і Цифризациі Анджея Галіцкого (міністра одповідаючого за справы нацийональных і етнічных меншын) та інчых міністрів, але продолжаюче ся надзвычайне засіданя уряду в справі проблему іміґрантів з Африкы і Близкого Сходу не позволило прибыти ім на торжественну стрічу з нагоды покликаня СКУтНіЕМ.

По короткій кавовій перерві, ювілейне засіданя Спільной Комісиі Уряду та Нацийональных і Етнічных Меншын зачало ся од промовы віцеміністра С. Гусковского, пак начальника Д. Жемєнєвского, а наконец голос забрал Рафал Бартек – спілведучий Спільной Комісиі Уряду та Нацийональных і Етнічных Меншын.

Долов найдете пару знимок з торжественного засіданя Спільной Комісиі Уряду та Нацийональных і Етнічных Меншын, а полна ґалерия находит ся за тым мотузком.