Торжество в Ґорлицях

В найближшу суботу (5. квітня 2014 рока) в Ґорлицях буде проходило выняткове торжество для вшыткых християньскых вірных – внесіня копіі Іверской Іконы Божой Матери зо св. Горы Атос до православной катедры пп. св. Тройцы в Ґорлицях.

Ікона є благословліньом атоскых монахів для ґорлицкой церкви з нагоды 100. річниці смерти і 20. канонізациі свящмч. Максима Ґорлицкого (Сандовича).
Богослужыня будут возглявляти владыкы: Його Высокопреосвященство Авель, Архієпископ Любліньскій і Холмскій, та Його Преосвященство Паісий, Єпископ Ґорлицкій.

Плян торжественных подій:
9.00 – Привитаня владык і внесіня іконы до храму
9.10 – Акафист перед іконом
10.00 – св. Божеска Літургія

Іверска Ікона презентує тип Годеґетриі – найстарший і найпопулярнійший іконоґрафічний тип представляючий Божу Матір з Дітятком на руці. Правом долоню Божа Матір вказує на Ісуса Христа. Што выняткове для іверской іконы, то рыса на правым лици Богородиці. За переданями, ікона остала натята через вояка в часах іконоклязму (VIII-IX ст.), а з раны мала поплынути правдива кров. Престрашений жолнір мал лишыти ікону і втечы.
Копіі іконы находят ся в православных осередках цілого світа, м.ін. в Москві, в Монтреали, ци на Гаваях. Од суботы буде находила ся тіж в Ґорлицях.

Ікона коштувала 4500 € – жертводавці хотят остати анонімовыма.