Товариство Любителів Лабівской Землі кінчыт свою діяльніст

Як поінформувало Товариство Любителів Лабівской Землі, діяльніст того стоваришыня власні ся кінчыт. Товариство долгы рокы діяло для популяризациі істориі і культуры села Лабова, в тым неєднократно підкрисляло, што Лабова і околиці то могучый лемківскій реґіон.

Інформацию о закінчыню діяльности Товариство подало 15. січня/януара. Рішыньом реєстрового краківского суду Товариство Любителів Лабівской Землі было поставлене в стан ліквідациі, што значыт, же неодолга буде выкрислене з реґістру, а його діяльніст буде остаточно закінчена.

Ціль: познаня (часом нелегкой) істориі реґіону

Тота локальна орґанізация была основана з ініциятивы жытелів Лабовы, єдного з найбільшых лемківскых сел на Сандеччыні. Початкы діяльности сігают 2004 р. Серед основателів была м.ін. Целіна Цемпа, яка через тых двадцет років стала ся головном реґіональном активістком, в тым і приятельком Лемків. Як учытелька яла ся досліджати і лемківскій контекст істориі Лабовы. В 2015 р. Товариство рахувало 52 членів.

Загальном діяльністю Товариства была популяризация реґіону Лабовы. Целіна Цемпа і другы члены не забывали о тым, што Лабова і дооколичны села то традицийна русиньска територия. Прото – дознаючы ся о ліквідациі Товариства – высловлюєме свою подяку за дотеперішні діяня і добру спілпрацу – в тым з нашым радийом і Стоваришыньом «Руска Бурса» в Ґорлицях.

До Лабовы ходили сме парократно – брали сме участ в ріжных подіях орґанізуваных Товариством, а якы присвячены были збогачыню знаня о лемківскій бытности в тым селі. Контакты з лабівскыма активістами навязал і пак підтримувал долголітній шефредактор ЛЕМ.фм, Богдан Ґамбаль (1965-2020).

Познаня Лемковины і єй люди

На вебсайті Товариства публикували ся вшелеякого рода дописы і інформациі односячы ся як раз до лемківской істориі. Находила ся гын рубрика «Знаны Лабовяне», де представлено пару біоґрамів заслуженых нашых люди, уродженых в Лабові, або в сусідніх селах, м.ін. Димитрия Вислоцкого (Ваня Гунянкы), Анны Ільницкой з Вислоцкых, Нестора Жылича, о. Йоана Прислопского, др. Даміана Савчака, о. Василия Масцюха ци о. Миколая Малиняка.

Завдякы двадцетлітній діяльности ТЛЛЗ теперішні жытелі Лабовы годны были ближе познати лемківску історию, культуру і традицию. Діяльніст тота принесла лем позитивны результаты. Перед даякым часом Товариство печатало альбом Катажыны Бєляк і Целіны Цемпы пн. «Шляком церкви в ґміні Лабова».

Целіна Цемпа заповіла, што не зохаблят свойой дослідничой працы – хоче дальше досліджати історию лабівского реґіону, лем уж під своім меном.