«Традиция в объєктыві» – друга едиция конкурсу

Орґанізаторы ХХV Медженародового Фестівалю Народной Музыкы Фольковы Миколайкы, якыма сут Стоваришыня Аніматорів Фолькового Руху та Університет Маріі Кюрі-Склодовской, другій уж раз орґанізуют фотоґрафічний конкурс «Традиция в объєктыві». Влонишня едиция барз ся полюбила і была так успішна (так під взглядом кількости присланых знимок, як і іх якости і ріжнорідности), же рішено того рока зачати кус скорше.

Задача є проста – хто любит робити знимкы і робит іх добрі (хоц-бы і лем в його опініі ;)) може прислати конкурсовы фотоґрафіі од 1. вересня до 31. жолтня т.р. на адрес tradycjawobiektywie@gmail.com та выполнити зголошыньовий формуляр. Зміст знимок мусит выполняти цілі конкурусу, якыма сут: популяризация фольклору і представліня сучасных явиск інспіруваных традицийном культуром. Знимкы повинны быти поєдныма кадрами – не циклями знимок. Єдна особа може прислати макс. 3 знимкы.

До выграня тяжкы саквы з грошами:

•  І місце 500 зл + карнет на ХХV Медженародовий Фестіваль Народной Музыкы Фольковы Миколайкы,
•  ІІ місце 300 зл + карнет на ХХV Медженародовий Фестіваль Народной Музыкы Фольковы Миколайкы,
• ІІІ місце 200 зл + карнет на ХХV Медженародовий Фестіваль Народной Музыкы Фольковы Миколайкы.

Оголошыня выграных буде проходило в тракті ХХV Медженародового Фестівалю Народной Музыкы Фольковы Миколайкы в Люблині, якій буде проходил в другій вікенд грудня т.р., а выбраны фотоґрафіі будут запрезентуваны на поконкурсовій выставі в дн. 10.-21. грудня в ACK UMCS „Chatka Żaka” в Люблині в рамках того же фестівалю.

Більше дрібниц найдете за мотузком.

Контакт до орґанізатора:
Анета Вінярска – тел. 537 051 632, aneta.winiarska@op.pl

(фот. Тадеуш Баранєцкі, Обряд з рана, знимка выріжнена в влонишній едициі)