Церков в Королеві Рускій жде на дофінансуваня

Як заявлят сайт www.sadeczanin.info, грекокатолицка церков з Королевы Руской быти може буде одреставрувана. Вшытко залежыт од акцептaциі внеску, котрий остал зложений до Міністерства Культуры і Народового Дідицтва. Внескодацві передвиджуют консерваторско-будівляны роботы, але наступны етапы мали бы обняти детальну діґіталізацию цілой церкви.

Більше інрормаций про ідею і внесок – за приведеным горі мотузком.

Королева Руска то русиньскє село, положене на західній Лемковині, котре до 1947 рока было заселене Лемками. В 1967 році назву села змінено на Королева Ґурна. В селі містит ся деревяна грекокатолицка церков Різдва Пресвятой Богородиці, котра остала побудувана в 1815 році, хоц правдоподібні вежа є старша, будучы частю попередньой святыні. Необароковий розпис походит з поч. ХХ ст., в церкви находит ся м.ін. полний іконостас з ХІХ віку і два бічны олтарі з іконами свв. Кірила і Методия та свв. Владиміра і Ольгы.