Церковний фестіваль в Креници

Днес, 26. липця/юлия т.р., на Лемковині, в Креници одбуде ся V Фестіваль Церковных Хорів. Хоц церковна музыка часто несе радіст і надію, днешній фестіваль пройде на фоні смутной інформациі сперед двох днів, коли в недільне пополудня одышол до Вічности владыка перемышльско-новосандецкій Высокопреосвященнійший Кыр Адам.

Подія пройде в православній церкви св. Владиміра Великого, де од 14.00 год. буде мож почути пят вокальных ґруп. Серед них находят ся хоры з Польщы та Словациі. Вчас концертів почуєте домашніх выконавців з Крениці, т.є Хор Православной Парохііі Св. Владиміра, Мужскій Камеральний Хор «Клірос» з Ґорлиц, та Молодіжний Хор «Роса» з Устя Руского. Дальше, зо заходу Польщы на фестіваль приде ґрупа з Вроцлавя – Хор «Октоіх», фунґуючий при парохіі свв. Кірила і Методия, котрий є хором Ґарнізону Вроцлав Православного Оринарияту Польского Войска. З Пряшівской Руси на Лемковину приіхат женьскій хор з русиньского села Орябина (окрес Стара Любовня), котрий наштоден співат при тамтышній православній парохіі Успіня Пресвятой Богородиці.

В текучым тыжни в Креници пройде більше подій. В найблизшу середу (27.07), по чыні похорону владыкы Адама в Саноку тіло успошого архієрея остане зложене в гробници храму, котра зрыхтувана єст в підземлях церкви. О ден, в четвер (28.07) креницка громада буде празднувала храмовий праздник – кєрмеш при нагоді свята св. Владиміра Великого.

Долов реляция з влонишньой едициі фестівалю.

Церковну музыку буде мож тіж почути в будучу пятницю (29.07). од 16.00 год. в ганчівскій церкви Покровы Пресвятой Богородиці пройде черговий концерт в рамках «Співу з іконом на фоні», де выступит Мужскій Камеральний Хор «Клірос» з Ґорлиц, під дириґентуром дяка Ярослава Ґрича.