Цикль авторскых стріч з проф. Павлом Р. Маґочійом

В будучым тыжни одбудут ся авторскы стрічы з проф. Павлом Р. Маґочійом – автором книжкы «Pod osłoną gór. Dzieje Rusi Karpackiej i Karpatorusinów». Публикацию печатало выдавництво Libra PL.

З автором моноґрафічной книжкы про історию Русинів проф. Маґочійом буде мож стрітити ся в пятьох ріжных інституциях в ріжных частях Польщы.

Модерувати бесіды про зміст публикациі будут м.ін. історикы, політолоґы, специялисты з обшыри істориі держав Середньой і Східньой Европы.

Перша стріча пройде в найблизшый понедільок, 27. червця/юнія, в Нацийональным Етноґрафічным Музею в Варшаві о 18.00 год., модерувал єй буде др габ. Томаш Стрыєк, проф. Collegium Civitas. Др габ. Стрыєк специялизує ся в баданю найновшой істориі і сучасности Украіны, єст автором м.ін. книжкы пн. «Медженародны аспекты акциі ‘Вісла’».

Друга зо стріч пройде в просторах Польской Академіі Знань в Кракові. Бесіду з проф. Маґочійом поведут др габ. Олена Дуць-Файфер, проф. ЯУ та др габ. Анджей Зємба, історик, автор чысленных лемкознавчых публикаций. Стріча одбуде ся в віторок, 28. червця/юнія, о год. 17.30.

Дальша нагода подискутувати з проф. Маґочійом нажыво о тезах поміщеных в книжці буде в середу, 29. червця/юнія, о 18.00 год. в Музею Дворы Карвациянів і Ґладышів в Ґорлицях. Бесіду модерувал буде др габ. Ян Пісуліньскій, проф. РУ, котрый в науковій діяльности занимат ся м.ін. польско-украіньскыма односинами в ХХ ст. ци нацийональном політиком Другой Польской Республикы і Польской Народной Республикы.

Дві послідні стрічы пройдут в Саноку в Історичным Музею 30. червця/юнія о 17.00 год. та в Музею Лемківской Культуры в Зындрановій – 3. липця/юлия о 15.00 год.