Тяжко быти патріотом

До нашой тайной специяльной коміркы до справ гороскопів і гляданя того, чого і так неє (в говірці – “спецкомірка”) пришла інформация, же основана в 2003 р. під судовым реґістровым номером 0000152959 заслужена орґанізация Клюб Патріотів Лемківщыны (Klub Patriotów Łemkowszczyzny) переіменувала ся на Клюб Любителів Лемківщыны (Klub Miłośników Łemkowszczyzny).

Як інформує наше тайне джерело – зміна прошла правдоподібні в 2014 р. (як видно з приведеных фактів – была іщы тайнійша, як наше тайне джерело).

Най тот примір буде лекцийом для вшыткых меньше і більше формальных звязків, орґанізаций, осередків: 3+1 незамужных, як і 6+9 замужных, патріотычных і лем любительскых, з вежом і без, тых з надійом і безнадійных, тых, што лем танцуют, але і тых фурт як столп стоячых – як тяжко быти патріотом.

То бодай перша того рода революция в лемківскым середовиску. Дотепер, істотны зміны в орґанізациях тыкали ся такой “лем” перефарбуваня воєнных хоругов і, што ся з тым вяже, розрахунковой валюты (“на топі” сут канадийскы долярі і украіньскы гривні).