У Вігорлатьскім музею буде День традічных ремесел про молодеж

Вігорлатьскый музей в Гуменнім приготовлює на 14-го септембра 2022-го року подію про школьску молодеж з назвов День традічных ремесел.

Як інфомровала Яна Федічова з Вігорлатьского музея, творчі ділні традічных ремесел суть початочным проґрамом септембровых подій музея в рамках підпоры ідеї Днів европской културной дідовизны 2022.

Освітній зажытковый інтереактівный проґрам День традічных ремесел є заміряный на презентацію културной дідовизны традічной ремеселной выробы і народного кумшту реґіону вышнього Земпліна. Подія буде проходити в Експозіції народной архітектуры і бываня (сканзен), і є про вшыткы віковы катеґорії школьской молодежи.

Як дале інформовала Федічова, заміром є підпорити ремеселны зручности дітей і пробудити в них інтерес о рзовиток традічного ремеселного і художнього потенціалу про утримательну будучность реґіону.

Діти на події будуть ремеселны фахманы учіти наприклад ткати на короснах, робити із соломов, приучіти ся годны будуть і гончарьству, ковальству, можуть ся научіти як підкути коня, як робити підмальбу на скло, можливость буде і учіти ся різбарьству, а много далшого.  Так само будуть дітям в сканзені вказаны і рольницькы роботы.

В рамках переглядкы сканзену будуть діти мати і коментовану презентацію сакралной архітектуры карпатьского реґіону – народной културной памяткы Церькци святого Михаіла Архістратига із 1764-го року з автентічным бароковым іконостасом, вкаже ся їм народна архітектура, добове бываня, добовы ремеселны і польногосподарьскы серсамы.

Подію про школьскы колектівы приготовив Вігорлатьскый музей в Гуменнім як продовжіня довгодобого музейного ціклу обєктового навчаня в музею під назвов Ку коріням, традіціям, цінностям.

Фото: www.muzeumhumenne.sk.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА