Україньскы націоналісты спалили русиньскый флаґ

Україньскы націоналісты із «Закарпатського національно-патріотичного об’єднання Україна Соборна» вчера, 22-го януара 2017-го року, перед будовов Областной державной адміністрації в Ужгороді спалили русиньскый флаґ.

О події повідомив на своїм профілі на сіті Facebook ведучій орґанізації Орест Дідух. Ку оголошіню придав і відео, на котрім націоналісты спалять єден із сімболів Русинів, флаґ, котрый быв схваленый про вшыткых Русинів світа Світовым конґресом Русинів.

Націоналісты тот акт в Ужгороді зробили на річніцю „Злучіня вшыткых україньскых земель“, што ся на Україні святкує як День соборности, із 22-го януара 1922-го року. За словами Дідуха „звернули ся (тым актом, позн. редакції) до вшыткых Українців Закарпатя, і прпомянули то, якый є досправдовый історічный флаґ Закарпатя.“

У выголошіню націоналістічной орґанізації ся пише о русиньскім флаґу як о флаґу сепаратістів, котры себе называють Русинами і брыдять „честне мено всіх нас Українців-русинів Закарпатя.“ Націоналісты апелують на Русинів, жебы не хосновати „москальску“ сімболіку, і діштанцовати ся од вшыткых засідань, округлых столів, котры бы за їх думками мали служыти лем на дестабілізацію Закарпатя.

Націоналісты так само рекомендують слухати їх слова, же Закарпатя є Україна, же їх язык є україньскый і же суть україньсков молодежов, котрой сімболом є жовто-синій флаґ, котрый їм „зохабили предкы“. Так само підкреслюють, же кому ся то не любить, ці то русофіл, ці то мадярон, націоналісты му можуть допомогти опустити „їх“ рідный Закарпатьскый край.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА