На внесок православного ґорлицкого єпископа Паісия, Містецка Рада з Ґорлиц змінила названя части дотеперішньой ул. Бжехвы на ул. свщм. Максима Ґорлицкого (2014 рік то сотна річниця смерти і двадцета канонізациі), при котрій находят ся м.ін. православна церков св. Тройці (памятник мученичой смерти о. Максима Сандовича) і парафіяльны будинкы враз з Осередком Православной Культуры ЕЛПІС.
То уж наступна подія, яка асоциює лемківского православного святого з днешніма Ґорлицями. В 2012 р. (тіж рішыньом Містецкой Рады) свщм. Максим Ґорлицкій остал патроном православных жытелів міста.
Отец Максим Сандович был розстріляний австрийскым ротмістром перед ґорлицкым судом в 1914 р. В 80. річницю смерти канонізуваний Польском Автокефальном Православном Церквю як “Мученик за Віру”, але Лемкы зачали вішати в хыжах знимкы о. Максима посеред ікон такой одраз по його смерти, што вказує на розвиток його культу на долго до канонізациі.
Коментарі