Юбілей сторічніці приєднаня Підкарпатьской Руси до складу Чехословакії собі примомянуть і в Кошыцях. 2-го октобра 2019-го року ся одкрыє у Выходословацькой ґалерії експозіція під назвов Уменя Підкарпатьской Руси 1918 – 1938 / Чехословацькый слід.
Выставный проєкт, котрый приготовив куратор Мірослав Клебан, є заміряный на малярьство і скулпторство Підкарпатьской Руси в часі, коли тота теріторія творила часть новой державы. Выставку опередила научно-бадательска робота, котра занимала ся історійов меджівойнового періоду в конфронтації з кошыцьков і европсков модернов.
Класіци і архівны матеріалы
Як інформує сайт Выходословацькой ґалерії в анотації ку выставці, колекіця представить навщівникам окрім класіків підкарпатьской русиньской малярьской школы як Бокшай, Ерделій ці Манайло і дотеперь менше знамых локалных авторів, котры ся рушали на сцені чеській, словацькій і підкарпатьскій.
„Окрім умелецько-історічной аналізы творів окремых авторів ся концепція буде дакус операти і о складны історічны реалности, котры формовали общественнй, културный і політічный фон того реґіону. Частьов выставкы будуть і добовы фотоґрафії ці різны архівны матеріалы, котры будуть паралелно ілустровати жывот в Кошыцях і в Ужгороді, як вызначных културных центрах выходной части першой републікы,“ інформує ґалерія
Реакція на сторічніцю приєднаня Підкарпатя
Орґанізаторы выставков реаґують на сторічніцю приєднаня теріторії Підкарпатьской Руси до Складу Чехословакії. Амбіційов проєкту є подля орґанізаторів представити шырокій публіці дотеперь мало пробадану область історії уменя і інтеґровати тым уменя Підкарпатьской школы до чехословацькой історії уменя.
„Коротка епізода сполочноой державы Чехів, Словаків і Русинів залишыла в чехословацькім уменю (літературі і вытварнім уменю) невычеркнутельный слід, котрого іншпірацію находиме якраз в етноґрафічнім, топоґрафічнім і фолклорнім оточіню теріторії Підкарпатьской Руси.“
Выставка має за думками орґанізаторів міцный едукачный потенціал і популарно-научным штілом представить навщівникам дотеперь мало, або нияк непрезентоване уменя в шыршых, надреґіоналных повязанях. Уменя Підкарпатькой Руси буде мож в Кошыцях видіти аж до 23-го фебруара 2020-го року.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі