Упамятнят річницю смерти Новосільского

В найблизшу пятницю, 21. лютого/фебруара 2020 рока, пройдут упамятніня звязаны з девятом річницьом смерти проф. Юрия Новосільского. В тот ден в Кракові будут дві головны подіі. На початку буде панихіда, а пак наукова конференция, на котрій спомянут на лемківского артисту.

Упамятніня орґанізуют Центр Сакрального Кумшту ім. Юрия Новосільского і Музей Ікон в Кракові. Анонс про подію подала м.ін. Кристина Черні, популяризаторка і головна біоґрафка Юрия Новосільского.

Молитва і конференция

О 16.00 год. на Раковицкым Цмонтери в Кракові, в Алеі Заслуженых, де похованый покійный, буде одслужена панихіда. По ній, о 17.30 год. в просторах православной парохіі Успіня Пресвятой Богородиці при ул. Шпытальній 24 зачне ся наукова конференция, котра буде присвячена артистичній творчости Новосільского.

На конференциі під наголовком «Ікона і абстракция» буде запрезентуваных шіст тем. Православный священник з Варшавы, о. митр. Генрик Папроцкій выступит з темом «Абстракция в пониманю Новосільского». Біоґрафка артисты, др Черні буде бесідувала про «Малярску двоязычніст Новосільского». Потім буде мож слухати і прелекций на темы: «Медже абстракцийом і іконом», «Думка Новосільского о іконі», «Абстракция в іконі» і «Абстракция в давній церковній музиці».

Окрем наукового слова буде одкрыта і выстава абстракций і ікон Новосільского з колекциі Фундациі Новосільского, Стармах Ґалериі і краківской православной парохіі. Товаришыл акциі буде концерт давной церковной музикы в выконаню мужского ансамблю церковной музикы Катапетазма, під дириґентуром Лукаша Гайдучені.

Лемківскіст Новосільского

Новосільскій то єден з найвызначнійшый артистів лемківского походжыня. Автор не крыл свойой достоменности. Його няньо походил з Лемковины, зо села Одрехова.

Про Юрия Новосільского памятат лемківска меншына. В пяту річницю смерти Стоваришыня «Руска Бурса» в Ґорлицях поклало вінец на місци, де в 2011 р. спочал артиста (архівна статя за мотузком).

Лемківскіст Новосільского приближыли сме і в архівным інтервю др габ. Олены Дуць-Файфер, котре было емітуване в єдным з проґрамів авдициі «Боіско». Юрий Новосільскій представлял своє розумліня Лемковины, одчутя і звязкы з лемківском культуром. Його творчіст, іконы з часом находили ся ачий в декотрых православных, грекокатолицкых і римокатолицкых храмах, до котрых приналежат Лемкы в цілій Польщы.

Новосільскій одкрыто голосил, же Русины/Лемкы хоц сотками років жыли сусідуючы з інчыма нациями, то нияк не стратили своіх примет. Підтримувал, же через тото не треба бояти ся асиміляциі Лемків.